पुल्वामात चार दहशतवाद्यांचा खात्मा

पुलवामा: जम्मू-काश्मिरात दहशतवादी कारवाया सुरूच आहे. आज पहाटे देखील सुरक्षा रक्षक आणि दहशतवाद्यांमध्ये चकमक उडाली यात चार दहशतवाद्यांना ठार करण्यात यश आले आहे. हे चारही दहशतवादी लष्कर-ए-तोयबाचे आहेत. पुलवामा जिल्ह्यातील लस्सीपोरा येथे सुरक्षा दल आणि दहशतवाद्यांदरम्यान चकमक उडाली. या परिसरात अजून दोन ते तीन दहशतवादी लपून बसलेले असल्याची शक्यता असून त्यांचा शोध घेण्यात येत आहे.

या अतिरेक्यांकडून दोन एके रायफल्स, एक एसएलआर आणि एक पिस्तूल जप्त करण्यात आली आहे. या चकमकीत सुरक्षा दलाचे ३ जवान जखमी झाले आहेत. सीआरपीएफच्या ४४ आरआर बटालियन, भारतीय लष्कर आणि एसओजी यांनी संयुक्तपणे ही कारवाई केली. मारले गेलेले सर्व अतिरेकी लष्कर-ए-तोयबाचे आहेत. या ठिकाणी आणखी काही अतिरेकी लपून बसल्याची शक्यता असल्याने सर्च ऑपरेशन सुरू करण्यात आलं असून या संपूर्ण परिसराला जवानांनी घेराव घातला आहे.