‘पॅन सिटी’साठी 650 कोटींची निविदा निघणार
शहरात फायबर ऑप्टिक केबलद्वारे इंटरनेटचे जाळे
आयुक्त श्रावण हर्डीकर यांची माहिती
पिंपरी-चिंचवड :शहरात ‘स्मार्ट सिटी’ प्रकल्पांतर्गत महापालिकेमार्फत पॅन सिटीचा प्रकल्प राबविण्यात येणार आहे. पॅन सिटी प्रकल्पांतर्गत सुमारे 650 कोटींची निविदा काढण्यात येत आहेत. त्यानुसार शहराच्या विविध भागांत फायबर ऑप्टिक केबलद्वारे इंटरनेटचे जाळे उभारण्यात येणार आहे. त्यासाठी आवश्यक ठिकाणी खड्डे (डक्ट) घेण्यात येणार असल्याची माहिती, आयुक्त श्रावण हर्डीकर यांनी दिली.
फायबर ऑप्टिक केबलचे जाळे
पॅन सिटीतून फायबर ऑप्टिक केबलचे जाळे, 300 वाय-फाय स्पॉट करणे, नागरिकांसाठी स्मार्ट किऑक्स, सीसीटीव्ही, इंटरनेटद्वारे वाहतूक नियोजन, स्मार्ट सार्वजनिक वाहतूक, शहरात स्मार्ट पार्किंगची सोय, स्मार्ट पाणीपुरवठा सुविधा, स्मार्ट जलनि:सारण सुविधा, स्मार्ट घनकचरा व्यवस्थापन, स्मार्ट दिवाबत्ती व्यवस्था, पर्यावरणपूरक सुविधा आणि नियंत्रण, कमांड आणि कंट्रोल सेंटर उभारणे, जीआयएस ट्रॅकिंग सिस्टिम, सोशल मीडियाचा प्रभावी वापर आणि स्मार्ट सिटी मोबाइल अ‍ॅप या सुविधा संपूर्ण शहराला मिळणार आहेत.
वाहतूक, गुन्हेगारी नियंत्रण
शहराच्या विविध भागांत फायबर ऑप्टिक केबलद्वारे इंटरनेटचे जाळे उभारण्यात येणार आहे. त्यासाठी आवश्यक ठिकाणी खड्डे (डक्ट) घेण्यात येणार आहेत. भविष्यात नवीन वाहिनी अथवा केबल टाकताना हे डक्ट भाड्याने देऊन महापालिकेला उत्पन्न मिळणार आहे. या फायबरच्या केबल रस्त्याच्या बाजूला उभारण्यात येणा-या खांबाशी सलग्न ठेवणार आहेत. त्यातून वायफायची सुविधा शहरात विविध ठिकाणी उपलब्ध करणे सोपे होईल. साधारण 750 किलोमीटर लांबीचे फायबर नेटवर्क उभारण्यात येणार आहे. याशिवाय नागरी सेवांसाठी किऑस सेंटरमधून माहितीची सुविधा देण्यात येणार आहे. प्रमुख चौक व महत्त्वाच्या ठिकाणी सीसीटीव्हीचे जाळे उभारणार आहे. त्याचा उपयोग पालिका प्रशासनासह वाहतूक पोलीस व गुन्हेगारी नियंत्रणासाठी होईल, असेही हर्डीकर यांनी सांगितले.
काम नियोजनपूर्वक सुरू
या कामांसाठी 650 कोटींची निविदा काढण्यात येत आहे. निविदा अंतिम टप्प्यात असून लवकरच ती काढली जाईल. त्यानंतर ठेकेदाराला काम दिल्यानंतर स्मार्ट अंतर्गत ही कामे शहरात वेगाने सुरु होतील, असेही आयुक्त श्रावण हर्डीकर यांनी सांगितले. स्मार्ट सिटीत सहभागी झालेल्या इतर शहराच्या तुलनेत पिंपरी-चिंचवड शहराने वर्षभरात चांगले काम केले आहे. स्मार्ट सिटीच्या 100 शहरांच्या यादीत पिंपरीचा 28 वा क्रमांक आहे. शहरात अतिशय नियोजनपूर्वक काम सुरु आहे. उर्वरित शहरांनी ’डीपीआर’ देखील तयार केला नाही, असेही ते म्हणाले.