पेट्रोल दरवाढीविरोधात मनसेचे ‘भीक मांगो’

कार्यकर्त्यांकडून जोरदार घोषणाबाजी

पिंपरी : ‘सर्वसामान्यांची लूट आणि धनदांडग्यांना सूट’ असे या सरकारचे धोरण आहे. पेट्रोल डिझेल दरवाढीच्या माध्यमातून सरकारकडून जनतेची लूट केली जात आहे, असा आरोप करत महाराष्ट्र नवनिर्माण सेनेतर्फे आज (शनिवारी) पिंपरीच्या डॉ. बाबासाहेब आंबेडकर चौकात राज्य व केंद्र सरकार विरोधात आंदोलन करून निषेध व्यक्त करण्यात आला. कार्यकर्त्यांनी यावेळी ‘मोदी सरकार हाय हाय’ अशी जोरदार घोषणाबाजीही करण्यात आली. पेट्रोल दरवाढ दिवसेंदिवस वाढतच जाते आहे. त्यामुळेच मनसेतर्फे आज ‘भीक मांगो’ आंदोलन करण्यात आले. पिंपरीच्या चौकात उभ्या असलेल्या वाहनचालकांकडून ‘भीक’ मागण्यात आली.

मनसेचे शहराध्यक्ष सचिन चिखले यांच्या नेतृत्वाखाली करण्यात आले. या आंदोलनात सचिव राजू सावळे, रुपेश पटेकर, उपशहराध्यक्ष चंद्रकांत दानवले, भोसरी विधानसभा अध्यक्ष विशाल मानकरी, अंकुश तापकीर, महिला सेनेच्या शहर उपाध्यक्ष आश्‍विनी बांगर, विभाग अध्यक्षा अनिता पांचाळ आदी सहभागी झाले होते.

सलग अकरा दिवस पेट्रोल दरवाढ
सचिन चिखले यावेळी म्हणाले की, ‘जिस देश का राजा व्यापारी, उस देश की प्रजा भिकारी’ या म्हणीचा पुरेपूर प्रत्यय येणारा कारभार सध्या देशात सुरु आहे. जिथे जिथे जनतेला लुटता येईल, तिथे तिथे लुटण्याचा उद्योग केंद्र आणि राज्य सरकारने सुरू केला आहे. गेल्या दहा दिवसांपासून पेट्रोल आणि डिझेलचे दर दररोज भडकत आहेत. मोदी सरकारने सलग अकरा दिवस पेट्रोल आणि डिझेलची भाववाढ केली. कर्नाटक राज्यात सत्ता न मिळाल्यामुळे देशभरातील जनतेवर हे सरकार भाववाढ करुन वचपा काढत आहे की काय, या भाववाढीमुळे गृहिणींना कुटुंबाचा खर्च भागविणे अशक्य झाले आहे.