पाटना: दोन वर्षांपूर्वी उघड झालेल्या टॉपर्स घोटाळ्यानंतर बिहारमध्ये आता पुन्हा एकदा १२ परीक्षेतला घोळ पुढे आला आहे. यंदाच्या वर्षी दिलेल्या परीक्षेमध्ये अनेक विद्यार्थ्यी पेपर न देताही पास झाले आहेत. तर, काहींना प्रश्नपत्रीकेतील एकूण मार्क्सपैकीही अधिक गुण मिळाल्याचा दावा विद्यार्थ्यांनी केला आहे. बिहार स्कूल एग्जामिनेशन बोर्डाचा इयत्ता १२वीचा निकाल शुक्रवारी लागला. त्यानंतर निकाल आणि परिक्षेबाबतचा हा घोळ पुढे आला.
अरवल जिल्ह्यातील भीम कुमार नावाच्या एका उमेदवाराला गणितात एकूण ३५ गुणांच्या पेपरमध्ये चक्क ३८ गुण मिळाले आहेत. तर, ऑब्जेक्टिव प्रश्नांमध्येही ३५ गुणांपैकी ३७ गुण मिळाले आहेत.
पेपर दिला नाही तरीही पास
दरम्यान, चंपारण जिल्ह्यातही असाच प्रकार घडला असून, येथे राहणाऱ्या संदीप राजला भौतिकशास्त्रात (फिजिक्स) थेअरी पेपरला ३५ पैकी ३८ गुण मिळाले. इंग्रजी आणि राष्ट्रभाषा हिंदीमध्ये ऑब्जेक्टिव टाईप पेपरला शून्य गुण मिळाले आहे. दरभंगा येथील राहुल कुमारसोबतही असेच घडले असून, त्याला गणितात ऑब्जेक्टिव पेपरमध्ये चक्क ३५ पैकी ४० गुण मिळाले आहेत. वैशाली जान्हवी सिंह हिला बायोलॉजिमध्ये १८ गुण मिळाले. पण, तिचा दावा असा की, तिने बायोलॉजिचा पेपरच नाही दिला. पेपर न देता गुण मिळण्याचा प्रकार पटणातील सत्या कुमारसोबतही घडला आहे.