पैशांसाठी प्रियकराची हत्या करून प्रेयसीवर बलात्कार

अंबरनाथ । जोडप्याला बंदुकीचा धाक दाखवत, पैशाची मागणी करून एकाने प्रेयसीवर बलात्कार तर केलाच. मात्र, प्रियकरावर गोळीबार केल्याचा संतापजनक प्रकार ठाण्यात उघडकीस आला आहे. या घटनेत तरुणाचा मृत्यू झाला आहे. याप्रकरणी गुन्हा दाखल करण्यात आला आहे.चिंचपाडा-नालंबी गाव रस्त्यावरील टेकडीवर रात्री 8 वाजताच्या सुमारास एक तरुण आपल्या प्रेयसीसोबत दुचाकीवर बसून बोलत होता. यादरम्यान तेथे आलेल्या एकाने या जोडप्याला बंदुकीचा धाक दाखवत त्यांच्याकडून पैशांची मागणी केली. त्यानंतर त्या प्रियकराच्या छातीवर बंदूक ठेवत त्याला घाबरवले तसेच त्या तरुणाच्या प्रेयसीवर जबरदस्तीने बलात्कार केला. त्याला विरोध करणार्‍या प्रियकरावर बंदूकधारी लुटारूने गोळीबार केला. यात तरुणाचा जागीच मृत्यू झाला आहे. आरोपी घटनास्थळावरुन पळून गेल्यावर पीडित तरुणीने येणार्‍या जाणार्‍यांकडे मदत मागितली. त्यानंतर गावातील काही नागरिकांनी पोलिसांना या घटनेची माहिती दिली. ही घटना टिटवाळा पोलीस ठाण्याच्या हद्दीत घडलेली आहे. त्यामुळे अंबरनाथ पोलिसांनी प्राथमिक तपास करून गुन्हा त्यांच्याकडे वर्ग केला आहे. यापुढील तपास टिटवाळा पोलीस करत आहेत.

या घटनेत प्रियकराला मारण्यासाठी चोरट्यांनी पिस्तुलाचा वापर केल्याची बाब पोलीस तपासात समोर आली आहे. त्यात चोरटे हे स्थानिक गर्दुल्ले किंवा लुटारू असल्याची प्राथमिक शक्यता पोलिसांनी व्यक्त केली आहे. पण स्थानिक लुटारुंकडे महागडी पिस्तुल आली कुठून? हादेखील संशोधनाचा भाग आहे. त्यामुळं हा घडवून आणलेला प्रकार तर नसावा ना? याही शक्यतेला बळ मिळालं आहे. या प्रकरणाच्या तपासासाठी 3 पथकांची निर्मिती करण्यात आल्याची माहिती पोलिसांनी दिली आहे.

पुढे या, तक्रार करा
सोमवारच्या घटनेत मृत्युमुखी पडलेल्या गणेशप्रमाणेच अनेक प्रेमवीर एकांत मिळवण्यासाठी या भागात येतात. त्यापैकी अनेकांसोबत अशा लुटमारीच्या किंवा अत्याचाराच्या घटना घडल्या असतील. मात्र, आश्‍चर्याची बाब म्हणजे आजवर अशी एकही तक्रार पोलिसांकडे आलेली नाही. कारण एकच, ते म्हणजे समाजात होणारी बदनामी. मात्र, आशा घटना कुणासोबत घडल्या असतील, तर त्यांनी न घाबरता पुढे यावं, तुमची ओळख गुप्त ठेवली जाईल, असे आवाहन ठाणे पोलिसांकडून करण्यात आले आहे. हल्लीच्या धावपळीच्या जगात सगळ्यांनाच एकांत आणि शांतता हवी असते. मात्र एकांताच्या नादात असुरक्षित ठिकाणी जाऊन स्वतःचा आणि जोडीदाराचा जीव धोक्यात घालणं, हा मूर्खपणाच म्हणावा लागेल.

विरोध करत असताना गणेशवर गोळीबार
अंबरनाथ पश्‍चिम भागातील चिंचपाडा ते नालंबी हा रस्ता रात्रीच्या वेळी फारच कमी वर्दळ असलेला आहे. हा रस्ता पुढे टिटवाळा रस्त्याला मिळतो. शहापूर अस्नोली गावात राहणारा तरुण गणेश दिनकर हा आपल्या प्रेयसीसोबत अंबरनाथच्या नालंबी येथील रस्त्याच्या बाजूला बसला होता. गणेश हा शहापूरचा रहिवासी असला तरी आपल्या नातेवाइकांच्या चायनिजच्या दुकानात काम पाहत होता. त्यामुळे त्याचे वास्तव्य अंबरनाथमध्येच होते. गणेश हा दुचाकी बुलेट घेऊन घरातून बाहेर पडला. प्रेयसीला सोबत घेऊन तो त्या डोंगरावर बोलत बसला होता. त्याचवेळ एक तरुण मागून आला. त्याने बंदुकीचा धाक दाखवत त्यांच्याकडून पैशांची आणि बुलेटची चावीदेखील मागितली. त्यानंतर लुटारूने गणेशच्या प्रेयसीवर बलात्कार करण्याचा प्रयत्न केला. त्याला विरोध करण्यासाठी गणेश पुढे गेला. तोच त्या लुटारुने त्याच्यावर गोळीबार करून त्याला जखमी केले. त्यानंतर त्या तरुणीलादेखील बंदुकीचा धाक दाखवत तिच्यावर बलात्कार करून पसार झाला, असे पीडित तरुणीने सांगितले आहे.