पोटनिवडणुकीत 10 पैकी 5 जागांवर भाजपचा विजय
नवी दिल्ली – दिल्ली, राजस्थान आणि मध्यप्रदेशसह एकूणच 8 राज्यांतील 10 विधानसभा जागांसाठी घेण्यात आलेल्या पोटनिवडणुकीचे निकाल गुरुवारी जाहीर झाले. यात 10 पैकी तब्बल 5 जागा भाजपने जिंकल्या आहेत. कर्नाटकातील दोन्ही जागांवर तसेच मध्य प्रदेशातील अटेर या जागेवर काँग्रेसने विजय मिळविला. तर, तृणमूल काँग्रेसने आणि झामुमोने प्रत्येकी एक-एक जागा जिंकली आहे. मध्य प्रदेश, आसाम, राजस्थान, कर्नाटक, दिल्ली, हिमाचल प्रदेश, पश्‍चिम बंगाल आणि झारखंड येथे 9 एप्रलि रोजी मतदान पार पडले. तर, जम्मू आणि काश्मीरच्या अनंतनाग येथील लोकसभा जागेवर हिंसाचाराच्या सावलीत गुरुवारी मतदान झाले.
हिमाचल प्रदेशच्या भोरंज येथून भाजप उमेदवार अनिल धिमान यांनी तब्बल 8290 मतांनी पोटनिवडणुकीत विजय मिळविला. दिल्लीच्या राजौरी गार्डन विधानसभा जागेवर भाजप-अकाली दल युतीचे उमेदवार मनजिंदर सिंग सिरसा विजयी झाले. सिरसा यांनी 14,652 मतांनी विजय नोंदविला. आसामची धेमाजी विधानसभा जागा सुद्धा भाजपने काबिज केली. भाजप उमेदवार रानोज पेंगू यांनी 9,285 मताधिक्य मिळविले. राजस्थानच्या धौलपूर विधानसभा जागेवर भाजपच्या उमेदवार शोभाराणी कुशवाहा यांनी काँग्रेसचे प्रतिस्पर्धी बनवारीलाल शर्मा यांना 38,648 मतांनी पराभूत केले. मध्य प्रदेशच्या उमरिया जिल्ह्यातील बांधवगड येथे सुद्धा भाजपचाच विजय झाला. भिंड जिल्ह्यातील अटेर येथे काँग्रेसचा विजय झाला.
पश्‍चिम बंगालच्या कांठी जागेवरून तृणमूल काँग्रेस उमेदवार विजय झाले. कर्नाटकच्या नंजनगड आणि गुंदूलपेट या दोन्ही जागा काँग्रेसने मिळविल्या आहेत. यासोबतच झारखंडच्या लिट्टीपट्टा येथे झारखंड मुक्ती मोर्चा (झामुमो) च्या उमेदवारांनी विजय मिळविला.
दिल्लीत आपचे डिपॉझिट जप्त
दिल्ली विधानसभा पोटनिवडणूक भाजप व आप या दोन्ही पक्षांसाठी प्रतिष्ठेची होती. यात भाजपने 51.99% मतांसह प्रथम क्रमांकाचा पक्ष ठरला. 33.23% मतांसह काँग्रेस दुसर्‍या क्रमांकाचा पक्ष ठरला. तर, केवळ 13.11% मते मिळविणारे आम आदमी पक्षाचे उमेदवार हरजीत सिंग यांची अनामत रक्कम सुद्धा जप्त झाली.
काश्मीर लोकसभा जागेवर फेर मतदान
जम्मू आणि काश्मीरच्या अनंतनाग जिल्ह्यातील लोकसभा पोटनिवडणुकीच्या मतदान केंद्र क्रमांक 39 वर पुन्हा मतदान घेतले जात आहेत. 9 एप्रिल रोजी झालेल्या मतदानाच्या वेळी हिंसाचार झाल्याने येथे फक्त 7 टक्के मतदान झाले होते. त्यामुळे, निवडणूक आयोगाने या ठिकाणी पुन्हा मतदान घेण्याचे आदेश दिले.