पोटाला आधार, गरजूंना भोजन वितरण

जळगाव – देशासह जिल्ह्यात सर्वत्र लॉकडाऊन असल्याने जिल्हा रुग्णालय व अन्य रुग्णालयात पेशंट सोबत दाखल असलेल्या नातेवाईकांची गैरसोय होत असल्याने केशवस्मृती प्रतिष्ठान संचालित शहरी बेघर निवारा गृह व श्री देवीचंद छोरीया यांच्या सहकार्याने आज १३५ गरजूंना पोळी, भाजी व शिरा चे वाटप करण्यात आले.

या उपक्रमाकरिता बेघर निवारा गृहचे प्रकल्प प्रमुख दिलीप चोपडा यांच्या मार्गदर्शनाखाली ३ जणाची टीम तयार करण्यात आली होती. या टीम ने वैद्यकिय महाविद्यालय, बसस्थानक परिसर, विविध हॉस्पिटल मध्ये जाऊन फुड पॅकेट चे वितरण केले.

नागरिकांना घराबाहेर न पडण्याचे आवाहन

केशवस्मृती सेवासंस्था समूहाच्या आरोग्य विभागाच्या वतीने जळगाव शहरातील विविध विभागात ध्वनिफीतच्या आधारे लोकांना आवाहन करायला सुरुवात केली असून आवश्यकता असल्यासच बाहेर पडा, कोणत्याही अफवांवर विश्वास ठेऊ नका, घराबाहेर न पडता प्रशासनाला सहकार्य करण्याचे आवाहन करण्यात येत आहे.