पोलीस ठाण्यांमध्ये हजेरी मास्तरच्या ‘मनमानी’ कारभार
प्रभारी अधिकार्‍यानंतर हजेरी मास्तरचीच ‘चलती अन् दरारा’ ः सोयीस्करपणे लावल्या जाताहेत कर्मचार्‍याच्या ड्युट्या
जळगाव : जिल्ह्यातील सर्वच पोलीस ठाणे व कार्यकारी शाखेत हे हजेरी मास्तर हे पद निर्माण करण्यात आले आहे. हजेरी मास्तरने प्रभारी अधिकार्‍यांच्या परवानगीने दुय्यम पोलीस अधिकारी व कर्मचाजयांना चक्राकार पध्दतीने व समान न्याय तत्वावर ड्युटी लावणे अपेक्षित आहे. मात्र अलीकडच्या काळात हजेरी मास्तरकडून सोयीस्करपणे ड्युट्या लावल्या जात असून या हजेरी मास्तरच्या मनमानी कारभारामुळे सहनही करता येत नाही आणि सांगता येत नाही सर्व अशीच परिस्थिती सर्वच पोलीस ठाण्यांमधील कर्मचार्‍यांची असल्याचे चित्र आहे.
आर्थिक व्यवहार, हुजरेगिरी करणार्‍यांना सोयीप्रमाणे ड्युटी
पोलीस ठाण्यांमध्ये प्रभारी अधिकार्‍यानंतर याच हजेरी मास्तरची चलती व दरारा असतो. हे पद नेमके कोणाकडे असावे असेही सूत्र निश्चित नाही. मात्र काही ठिकाणी हजेरी मास्तर स्वत: निर्णय घेतात तर काही ठिकाणी प्रभारी अधिकारी हजेरी मास्तरला पुढे करुन हे काम करत असल्याचे दिसून आले आहे. काही पोलीस ठाण्यांमधील कर्मचार्‍यांनी दिलेल्या माहितीनुसार, मोजक्याच कर्मचार्‍यांना रात्रपाळी, सतत बाहेरगावची व अडचणीची ड्युटी लावली जाते, तर आर्थिक व्यवहार व हुजरेगिरी करणार्‍या कर्मचार्‍यांना सोयीप्रमाणे ड्युटी लावण्याचे काम जिल्ह्यातील अनेक पोलीस ठाण्यांमधील हजेरी मास्तरकडून केले आहे.
मोजकेच करताहेत वर्षानुवर्ष हजेरी मास्तरची ड्युटी
प्रत्येक पोलीस कर्मचार्‍याने नवचैतन्य कोर्स बंधनकारक आहे. मात्र बहुतांश हजेरी मास्तर या कोर्सला गेलेलेच नसल्याची सूत्रांची माहिती आहे. विशेष या हजेरी मास्तर कधीही स्वतः रात्रपाळीची ड्युटीही करत नाही तसेच कुठल्याही तपास कामात त्यांचा सहभाग नसतो, गुन्ह्याचा तपासही ते स्वत:हून घेत नाही किंवा प्रभारी अधिकारीही त्यांच्याकडे तपास सोपवत नाहीत. मोजकेच कर्मचारी वर्षानुवर्ष हजेरी मास्तरची ड्युटी करीत आहेत. पोलीस शिपाई ते सहायक फौजदार या पदापर्यंतचे कर्मचारी हजेरी मास्तरची ड्युटी करताना दिसून येत आहेत.
हजेरी मास्तरला कंटाळून आत्म्हत्येच्याही घटना
हजेरी मास्तरला कंटाळून काही कर्मचार्‍यांनी आत्महत्येचा प्रयत्न केल्याच्या घटना जिल्ह्यात घडल्या आहेत. गेल्या वर्षी तर एका महिला कर्मचाजयाने पोलीस ठाण्यातच अतिरिक्त गोळ्या सेवन करुन आत्महत्येचा प्रयत्न केला होता, तेव्हा या महिलेने आत्महत्येपूर्वी चिठ्ठीही लिहिली होती. दोन पोलीस ठाण्यांमध्ये तर दोघांनी महिला कर्मचार्‍यांशी अश्लिल वर्तन केल्याचा प्रकार घडला. मात्र दुर्देव म्हणा कि हजेरी मास्तरचे वजन यामुळे वरिष्ठांकडे तक्रारी होऊनही हजेरी मास्तरवर कारवाई झाली नाही. उलट तो त्याच ठिकाणी ते ड्युटी करीत आहेत. हजेरी मास्तरांच्या काही तक्रारी झाल्या तरी प्रभारी अधिकार्‍यांच्याच सांगण्यावर वरिष्ठ विश्वास ठेवतात, म्हणून पोलीस ठाण्यांमध्ये खदखद व गटबाजी अधिक वाढत असून सर्वच कर्मचारी हजेरी मास्तरच्या विरोधात असल्याचे पहावयास मिळत आहे.