श्रीनगर : लष्करात किंवा पोलिसांत भरती झालात तर खबरदार, अशा धमक्या देणार्या दहशतवाद्यांना काश्मिरी तरुण-तरुणींनी चोख प्रत्युत्तर दिले आहे. या पोलीस भरतीसाठी रांगा लावून या तरुण-तरुणींनी दहशतवाद्यांना चोख उत्तर दिले आहे. जम्मू-काश्मीर पोलीस खात्यात उपनिरीक्षक पदासाठी झालेल्या शारीरिक क्षमता चाचणीसाठी खोर्यातील दोन हजार तरुण-तरुणी सहभागी झाले होते.
जम्मू-काश्मीरच्या शोपियान जिल्ह्यात लष्कराचे तरुण-तडफदार अधिकारी लेफ्टनंट उमर फयाज यांची दहशतवाद्यांनी अपहरण करून हत्या केली होती. ही हत्या करून तिथल्या दहशतवाद्यांनी भारतीय लष्करापासून दूर राहा, असा गर्भित इशाराच काश्मिरींना दिला होता. परंतु, या घटनेला चार दिवस उलटत नाहीत, तोच काश्मिरी तरुणांनी आपला ठाम निश्चिय प्रत्यक्षात आणून दाखवला. आम्ही तुमच्या धमक्यांना भीक घालत नाही, हे त्यांनी कृतीतून दाखवून दिले आहे. पोलीस उपनिरीक्षकाच्या 698 जागांकरता तब्बल 67,218 जणांनी अर्ज भरला आहे. त्यांच्यापैकी दोन हजार तरुण-तरुणींनी शनिवारी बख्शी स्टेडियममध्ये रांगा लावल्या होत्या.
मी दहशतवाद्यांशी लढायला तयार आहे. ते चुकीच्या मार्गाने जात आहेत आणि त्यांच्या आजारावर जालीम उपाय करणं आवश्यक आहे, असा निर्धार श्रीनगरचा पदवीधर तरुण मोहम्मद रफीक भट्ट याने व्यक्त केला. तर, स्थानिक महिलांची मदत करण्यासाठी पोलीस खात्यात येण्याची इच्छा नुसरत या तरुणीने बोलून दाखवली. जम्मू-काश्मीर पोलिसांत काम करायची संधी मिळाली तर मी स्वतःला नशीबवान समजेन, अशी प्रतिक्रिया भरतीसाठी आलेल्या फरझाना या तरुणीने दिली आहे.