प्रकाश जावडेकरांच्या वक्तव्याचा शिक्षक संघटनांकडून विरोध

मुंबई : सरकारकडे शाळांनी भीक न मागता माजी विद्यार्थ्यांकडे आर्थिक मदत मागावी, असे वक्तव्य करणाऱ्या केंद्रीय मनुष्यबळ विकास मंत्री  प्रकाश जावडेकर यांच्याविरोधात नाराजी आहे. जनप्रबोधिनी आयोजित माजी विद्यार्थ्यांच्या कार्यक्रमात जावडेकर यांनी अनुदान मागणाºया शाळांना संबोधित करताना हे वक्तव्य केले होते. मात्र विरोधी पक्षात असताना याच मुद्द्यावर भाजपाने  शिक्षकाना आश्वासन दिले होते. त्यामुळे मतांसाठी खोटी आश्वासने देत अशी वक्तव्ये करणाºया जावेडकर यांचा महाराष्ट्र प्रदेश काँग्रेस शिक्षक सेलने तीव्र शब्दांत निषेध केला आहे.

शिक्षक सेलचे अध्यक्ष मनोज पाटील म्हणाले की, विरोधी पक्षात असताना स्वत:  यांनी शाळांना अनुदान व शिक्षकांना वेतन मिळावे, यासाठी शिक्षक व शाळांच्या आंदोलनात सहभाग नोंदवला होता. विनाअनुदान शाळा चालविणे कठीण बाब आहे, म्हणून सत्तेवर आल्यास भाजपा १०० टक्के अनुदान देईल, असे आश्वासनही त्यांनी आंदोलकांना दिले होते. उपाशीपोटी क्रांती होऊ शकत नाही, मग चांगले अध्यापन कसे होणार, असा सवाल उपस्थित करत भाजपा शिक्षकांना उपाशीपोटी ठेवणार नाही, असे जावडेकर यांनी भाषणात सांगितले होते. मात्र सत्ता येताच त्यांना या भाषणाचा आणि आश्वासनांचा विसर पडल्याची टीका पाटील यांनी केली आहे.