प्रकाश वझे यांचे अपघाती निधन

मुंबई । मुंबई क्रिकेट संघटनेचे सुवर्णपदक विजेते क्रिकेट अंपायर डॉक्टर प्रकाश वझे यांचे ठाणे येथे ट्रक अपघातात निधन झाले. ठाण्यातील आनंदनगर चेक नका परिसरात झालेल्या या अपघातात ट्रकने दिलेल्या धडकीत डॉक्टर वझे यांचा जागीच मृत्यू झाला तर त्यांच्यासोबत असलेला त्यांचा सहाय्यक नागप्पा हेडगे गंभीर जखमी झाला. रस्त्यावर असलेला खड्डा चुकवताना डॉक्टर वझे यांना मागून येणार्‍या ट्रकने जोरदार धडक दिली. हेडगे याच्यावर रुग्णालयात उपचार सुरु आहेत.

सुवर्णपदक विजेते असलेल्या वझे यांनी वैद्यकीय व्यवसाय सांभाळून मुंबई क्रिकेट संघटनेच्या अनेक प्रथम श्रेणी सामन्यामध्ये अंपायर म्हणून काम पहिले होते. अपायरिंग करत असतांना त्यांनी अनेक वर्षे नवोदितांसाठी मोफत क्रिकेट अंपायर प्रशिक्षण शिबिरे आयोजित केली होती. स्वत:च्या नावाने स्थापन केलेल्या डॉक्टर प्रकाश वझे क्रीडा प्रतिष्ठानच्या माध्यमातून त्यांनी वैद्यकीय व्यावसायिकांसाठी टेनिस, डबल विकेट क्रिकेट, बॅडमिंटनच्या राज्यस्तरीय स्पर्धांचे आयोजित केल्या होत्या. याशिवाय स्थानिक पातळीपासून फिडे रेटिंग बुध्दिबळ स्पर्धा आयोजित करून डॉक्टर वझे यांनी मुंबई, ठाणे, रायगड, पालघर जिल्ह्यातील उदयोन्मुख बुध्दिबळपटूना एक व्यासपीठ उपलब्ध करून दिले होते.