प्रथमच एक हिंदू दलित महिला बनली पाकिस्तानची सिनेट

कराची । कट्टरपंथी मुस्लीमराष्ट्र अशी ओळख निर्माण झालेल्या पाकिस्तानच्या इतिहासात प्रथमच एक हिंदू दलित महिला सिनेटची सदस्य म्हणून निवडून आली आहे. कृष्णाकुमारी कोहली असे त्यांचे नाव असून, बिलावल भुट्टो झरदारी यांच्या नेतृत्वाखालील पाकिस्तान पीपल्स पार्टीच्या (पीपीपी) त्या सदस्य आहेत.

सावकाराने 3 वर्षे बंदी बनवले होते
कृष्णाकुमारी कोहली (वय 39) या सिंध प्रांतातून ज्या मतदारसंघातून निवडून आल्या आहेत तो मतदारसंघ महिलांसाठी राखीव आहे. सिंध प्रांतातील थार जिल्ह्याच्या नगरपारकर गावच्या त्या रहिवासी आहेत. कोहली यांचा जन्म एका गरीब कुटुंबात झाला. कोहली आणि त्यांच्या कुटुंबाला येथील एका सावकाराने तीन वर्षे बंदी म्हणून ठेवले होते. त्यावेळेला त्यांना बंदी बनवण्यात आले होते त्यावेळी त्यांचे वय आठ वर्षे होते. आता मुस्लीमबहुल राष्ट्रातील त्यांची निवड चर्चेचा विषय बनला आहे.

लग्नानंतर पदव्युत्तर पदवीचे शिक्षण
कोहली यांनी लालचंद यांच्याशी विवाह केला. ज्यावेळी लग्न झाले त्यावेळी त्या नववीत होत्या. लग्नानंतर त्यांनी समाजशास्त्रात पदवीव्युत्तर पदवी घेतली आहे. सिंध विद्यापीठातून त्यांनी आपले शिक्षण पूर्ण केले. पाकिस्तानात स्थलांतरित झालेल्या नागरिकांच्या हक्कासाठी त्या काम करतात. त्या ज्येष्ठ स्वातंत्र्यसैनिक रुपलो कोहलीच्या कुटुंबातील आहेत. सिंध प्रांतात सिनेटसाठी झालेल्या निवडणुकीत कोहली निवडून आल्या. त्यांचा भाऊही कार्यकर्ता आहे.