प्रभाग क्रमांक 26 मध्ये बेकायदा बांधकामे पाडली

0

पिंपरी : महापालिकेच्या प्रभाग क्रमांक 26, मोहननगर, काळभोरनगरातील अनधिकृत बांधकामांवर बांधकाम परवानगी व अनधिकृत बांधकाम नियंत्रण विभागाने धडक कारवाई केली. या कारवाईत आरसीसी बांधकामासह 320 चौरस फुटाचे अनधिकृत बांधकाम निष्कासित करण्यात आले.

आरसीसी बांधकाम पाडले
महापालिकेच्या ‘अ’ क्षेत्रिय कार्यालयांतर्गत प्रभाग क्रमांक 26, काळभोरनगर (मोहननगर) येथे अनधिकृत बांधकाम सुरू असल्याची माहिती बांधकाम परवानगी व अनधिकृत बांधकाम नियंत्रण विभागाला मिळाली होती. या विभागातील अधिकार्‍यांच्या पथकाने याची दखल घेऊन सुरू असलेल्या 320 चौरस फुटाच्या आरसीसी बांधकामावर कारवाई केली. ‘अ’ क्षेत्रिय कार्यालयाचे कार्यकारी अभियंता मकरंद निकम यांच्या मार्गदर्शनाखाली ही कारवाई झाली. उपभियंता केशवकुमार फुटाणे, कनिष्ठ अभियंता व स्थापत्य अभियांत्रिकी सहायक (बीट निरीक्षक) यांच्या पथकाने ही कारवाई केली. सुरक्षेसाठी पिंपरी पोलीस ठाण्याचे एक पोलीस उपनिरीक्षक, एक पोलीस शिपाई, महापालिकेचे एक पोलीस उपनिरीक्षक, 10 पोलीस, 1 जेसीबी मशीन, 7 ठेकेदार मजूर व महापालिकेचे दोन कर्मचारी यांचे सहकार्य घेण्यात आले.