प्रवासी केंद्रस्थानी ठेवून धोरणे राबवणार!

पुणे : प्रवाशांना केंद्रस्थानी ठेवून, संपूर्णपणे व्यावसायिक स्वरूपात पुणे महानगर परिवहन महामंडळ (पीएमपीएमएल) कंपनी चालवण्यात येईल, असे प्रतिपादन पीएमपीएमएलचे नवीन अध्यक्ष व व्यवस्थापकीय संचालक तुकाराम मुंडेे यांनी बुधवारी केले. सेवा सुधारण्यासाठी चांगल्या उत्पन्नाची गरज असते. त्यामुळे उत्पन्न कसे वाढेल याकडे लक्ष दिले जाईल, असे मुंडेे यांनी सांगितले. पीएमपीएमएलचे माजी अध्यक्ष अभिषेक कृष्णा यांची नऊ महिन्यांपूर्वी नाशिकच्या महापालिका आयुक्तपदी नियुक्ती करण्यात आली होती. तेव्हापासून पीएमपीएमएलच्या अध्यक्षपदाचा प्रभारी कारभार पुण्याचे महापालिका आयुक्त कुणाल कुमार यांच्याकडे सोपविण्यात आला होता. सुरुवातीला पीएमपीएमएलच्या अध्यक्षपदी अण्णासाहेब मिसाळ यांच्या नियुक्तीचे आदेश देण्यात आले होते. मात्र, त्यांनी पुण्यातील बदलीला नकार दिल्यामुळे मुंडेे यांच्याकडे हा पदभार देण्यात आला आहे. ही जबाबदारी स्वीकारण्यास मुंडेे अनुत्सुक असल्याचे सांगण्यात येत होते. त्यामुळे ते पदभार स्वीकारणार का, याकडे सर्वांचे लक्ष लागले होते. अखेर बुधवारी पीएमपीएमएलचे अध्यक्ष व व्यवस्थापकीय संचालक म्हणून मुंडेे यांनी पदभार स्वीकारला. त्यानंतर त्यांनी पत्रकारांशी संवाद साधला. दरम्यान, मुंडे यांना पुणे महापालिका आयुक्तपदी नियुक्तीस मुख्यमंत्री अनुकूल असून, कुणाल कुमार कार्यकाळ पूर्ण करतील. सरकार मुंडे यांना फार काळ साईड पोस्टिंगला ठेवण्यास इच्छुक नाही, अशी माहिती वरिष्ठस्तरीय सूत्राने दिली.

कंपनीचे उत्पन्न वाढविण्यावर भर देणार
शिक्षणासाठी आपण काही काळ पुण्यात होतो. त्यावेळी पीएमटीने प्रवास केला होता, अशी आठवण सांगून मुंडेे म्हणाले, ओला आणि उबेरसारख्या कंपन्या तंत्रज्ञानाचा वापरामुळे फायद्यात आहेत. अशाच तंत्रज्ञानाचा वापर पीएमपीसाठी करता येईल. प्रवाशांच्या अडचणी समजून घेण्यासाठी त्यांच्यामध्ये जायला आवडेल. तसेच प्रथमतः ब्रेक डाऊनची कारणे शोधून काढून मग पुढील नियोजन केले जाईल. डॉ. श्रीकर परदेशी यांनी काही चांगली धोरणे स्वीकारली होती. गरज पडल्यास त्या धोरणांचाही अवलंब केला जाईल. नवी मुंबईत कार्यरत असताना तेथील परिवहन विभागात काही सुधारण केल्या होत्या. त्या सुधारणांचा फायदा त्या सेवेला झाला होता. तो थोडा अनुभव गाठीशी असून, त्या बळावरच पीएमपीचा कारभार सुधारण्यास मी प्राधान्य देईन, असेही मुंडेे यांनी स्पष्ट केले. कोणत्याही कंपनीचे उत्पन्न वाढले, तर खर्च करण्यास वाव असतो. पीएमपीची सेवा सक्षम करण्यासाठी पीएमपीचे उत्पन्न वाढवावे लागेल. या उत्पन्नवाढीला माझे प्राधान्य राहील, असेही त्यांनी सांगितले. प्रत्येक संस्थेच्या विशिष्ट कार्यपद्धतीनुसार तेथे काम केले जाते. पीएमपी ही कंपनी असल्याने तेथे संचालक मंडळ आहे. हे मंडळ निर्णय घेते अन् त्यानुसार काम केले जाते. त्यामुळे पीएमपीत राजकीय हस्तक्षेप कसा असेल, असा उलटा सवाल त्यांनी केला. नवी मुंबईत आयुक्त असताना सिडकोच्या समितीवर संचालक होतो. त्यामुळे संचालक मंडळ कसे चालते, कंपनी कशी चालते, याचा अनुभव आहे, असेही मुंडे म्हणाले.

कुणाल कुमार, वाघमारे कार्यकाळ पूर्ण करणार!
पुणे किंवा पिंपरी-चिंचवडच्या आयुक्तपदी तुकाराम मुंडे यांची वर्णी लागावी यासाठी भाजपमधील एक गट सक्रीय आहे. या गटाने त्यासाठी मुख्यमंत्री देवेंद्र फडणवीस यांच्याकडे जोरदार लॉबिंगही केले होते. परंतु, दोन्हीही आयुक्तांना त्यांचा कार्यकाळ पूर्ण करू द्या, त्यानंतर मुंडे यांच्या आयुक्तपदाबाबत बघू, असा दिलासा मुख्यमंत्र्यांनी या गटाला दिला असल्याचे खात्रीशीर सूत्राने सांगितले. मुख्यमंत्र्यांचा हा निरोप मिळाल्यानंतरच सुरुवातीला पीएमपीएमएलचे अध्यक्षपद स्वीकारण्यास नकार देणारे मुंडे हे तातडीने कामावर रुजू झाले. मुंडेंसारख्या कर्तव्यकठोर अधिकार्‍याला फारकाळ साईड पोस्टिंग देण्यास खुद्द मुख्यमंत्रीही अनुत्सुक असल्याचेही हे सूत्र म्हणाले.