‘प्रिमियर’ आंदोलनाला आमदार महेश लांडगे यांचा पाठिंबा

कामगार आयुक्तांना चर्चा करण्याची सूचना

आकुर्डी : प्रिमियर लिमिटेड कंपनीच्या कामगारांचे गेल्या 50 दिवसांपासून आंदोलन सुरु आहे. या कामगारांची भोसरीचे आमदार महेश लांडगे यांनी भेट घेतली. त्यांच्या समस्या जाणून घेतल्या. याबाबत कामगार आयुक्तांना कंपनी व्यवस्थापनाशी चर्चा करण्याची सूचना केली आहे. मागील काही महिन्यांपासून कंपनीने कामगारांचे पगाराचे पैसे असूनही न देण्याचे धोरण अवलंबविले आहे. यासाठी कामगारांनी आमदारांना साकडे घातले. यावेळी क्षेत्रीय कार्यालयाचे स्वीकृत सदस्य पांडुरंग भालेकर, पांडुरंग साने, विनायक मोरे आदी उपस्थित होते.

गेल्या 50 दिवसांपासून आंदोलन
काही कामगारांना सेवानिवृत्त होऊनही सेवा वेतनाची रक्कम देण्यात आलेली नाही. त्यांचे भविष्य निर्वाह निधीचे अर्ज ही सादर करण्यात आले नाहीत. त्यामुळे कामगाराची आर्थिक पिळवणूक कंपनीने सुरु केलेली होती. त्यामध्ये कंपनीचे कुटील कारस्थान असल्याचे कामगारांच्या निदर्शनास आले आहे. कंपनीस ही जागा परस्पर विकायची असल्याचे लक्षात आले आहे. पगाराबाबत व्यवस्थापनाशी पत्रव्यवहार केला. मात्र, व्यवस्थापनाने दाद दिली नसल्याचा आरोप करत कामगारांनी आंदोलन सुरु केले आहे. या
मागण्यांसाठी ते गेल्या 50 दिवसांपासून आंदोलन करत आहेत.

पिळवणूक होऊ नये
या कामगारांची आमदार महेश लांडगे यांनी बुधवारी भेट घेतली. त्यांच्या समस्या जाणून घेतल्या. याबाबत कामगार आयुक्तांना कंपनी व्यवस्थापनाशी चर्चा करण्याचे सूचना केली आहे. त्यानुसार कामगार आयुक्त कंपनी व्यवस्थापनाशी चर्चा करणार आहेत. या बैठकीला आमदार लांडगे देखील उपस्थित राहणार आहेत. आमदार लांडगे म्हणाले की, कामगारांना न्याय मिळणे गरजेचे आहे. कंपनी व्यवस्थापनाने कामगारांकडे सहानुभूतीने पाहिले पाहिजे. कामगारांना वेतन देणे गरजेचे आहे. त्यांच्यावर कुटुंब अवलंबून असते. कामगारांची पिळवणूक होऊ नये, याची दक्षता घेणे गरजेचे आहे.