प्रियांका गांधी यांना लोकांना मारहाण करण्याचा आजार; सुब्रमण्यम स्वामी यांचे वादग्रस्त वक्तव्य

नवी दिल्ली : प्रियांका गांधी यांची कॉंग्रेस महासचिव म्हणून नियुक्ती झाल्यानंतर राजकीय क्षेत्रातून वेगवेगळ्या प्रतिक्रिया येत आहे. भाजपकडून प्रियांका गांधी यांच्या निवडीवरून तिखट प्रक्रिया व्यक्त केली जात आहे. भाजपचे नेते हे पातळी सोडून प्रियांका गांधी यांच्यावर टीका करत आहे. दरम्यान भाजपाचे ज्येष्ठ नेते खासदार सुब्रमण्यम स्वामी यांनी प्रियंका गांधी यांच्याबद्दल वादग्रस्त विधान केले आहे. ‘प्रियंका गांधी यांना एक आजार असून तो सामाजिक जीवनात योग्य नाही. त्यांना इतरांना मारहाण करण्याचा आजार आहे. या आजाराला बायपोलैरिटी म्हणतात. या आजारातून त्यांचे हिंसावादी चरित्र दिसून येते. प्रियंका गांधींच्या या आजाराबाबत जनतेला माहिती असले पाहिजे की, त्या स्वत:वरील संतुलन कधी गमावून बसतील, याबाबत कोणीही सांगू शकत नाही’ असे आक्षेपार्ह विधान त्यांनी केले आहे.

याआधीही प्रियंका गांधी यांच्या राजकीय प्रवेशानंतर भाजपाचे महासचिव कैलाश विजयवर्गीय यांनी त्यांची तुलना करिना कपूर आणि सलमान खानसारख्या बॉलिवूड कलाकारांशी केली होती. तर दुसरीकडे, भाजपाचे ज्येष्ठ नेते आणि बिहारचे मंत्री विनोद नारायण झा यांनी ‘काँग्रेसच्या नवनिर्वाचित महासचिव प्रियंका गांधी वाड्रा अतिशय सुंदर आहेत आणि याशिवाय त्यांच्याकडे दुसरा कोणताही गुण नाही. काँग्रेसने लक्षात ठेवले पाहिजे की, सुंदरतेमुळे मते मिळत नाही’ असे वादग्रस्त विधान केले होते.