प्लास्टिक पिशव्यांचा साठा करणाऱ्यांना १० हजाराचा दंड

पिंपरी-चिंचवड :– पर्यावरणाच्या संवर्धनासाठी राज्य सरकारकडून प्लास्टिक बंदी करण्यात आली आहे. तरीदेखील बऱ्याच ठिकाणी प्लास्टिक पिशव्या आढळून येत आहे. चिंचवड परिसरात प्लास्टिक पिशव्यांचा साठा करणाऱ्या दोन स्वीट मार्टवर कारवाई करत त्यांच्याकडून १० हजार रुपयांचा दंड महापालिकेच्या ‘ब’ क्षेत्रीय कार्यालयामार्फत वसूल करण्यात आला आहे. तर, तीन किलो प्लास्टिक पिशव्या जप्त करण्यात आल्या आहेत.

प्लास्टिक बंदीसाठी राबविली जात आहे मोहीम
पर्यावरणाच्या संवर्धनासाठी प्लास्टिक बंदीसाठी ‘ब’ क्षेत्रीय कार्यालयाच्या आरोग्य विभागामार्फत मोहीम राबविण्यात येत आहे. प्लास्टिक कचरा व्यवस्थापन व हाताळणी, प्लास्टिक कॅरीबॅगचे उत्पादन, साठा, विक्री व वापर बंदी मोहीम राबविण्यात येत आहे. परंतु बऱ्याच ठिकाणी प्लास्टिक पिशव्या आढळून येत असल्याने त्यांच्याकडून दंड वसूल करण्यात येत आहे. वाल्हेकरवाडी येथील पोर्णिमा स्वीट्स आणि भवानी स्वीट्स या दुकानांना प्रत्येकी पाच हजार रुपये दंड ठोठावण्यात आला असून त्यांच्याकडून तीन किलो प्लास्टिक पिशव्या जप्त करण्यात आल्या आहेत.

यांनी केली कारवाई
‘ब’ क्षेत्रीय अधिकारी संदीप खोत, सहायक आरोग्य अधिकारी कुंडलिक दरवडे, के. बी. पारोल, आरोग्य निरीक्षक के. बी. पारोल, संतोष दराडे, संतोष कांबळे यांच्या पथकाने ही कारवाई केली. प्लास्टिक कचरा व्यवस्थापन, साठा, विक्री व वापर बंदी अंतर्गत यापुढेही कारवाई सुरुच ठेवण्याचा इशारा क्षेत्रीय अधिकारी संदीप खोत यांनी दिला आहे.