फटाके विक्रीच्या परवान्यासाठी अर्ज करण्याचे आवाहन

बारामती । दिवाळीसाठी शोभेची दारु व फटाके विक्रीचे परवाने बारामतीच्या उपविभागीय दंडाधिकारी कार्यालयाकडून देण्यात येणार आहेत. इच्छुकांनी उपविभागीय दंडाधिकारी, बारामती उपविभाग, बारामती या पत्त्यावर परवान्यासाठीचा अर्ज साध्या कागदावर लिहून 15 ऑक्टोबर 2017 पूर्वी सादर करण्याचे आवाहन उपविभागीय दंडाधिकारी हेमंत निकम यांनी प्रसिध्दी पत्रकान्वये कळविले आहे.

परवान्यासाठी अर्जावर 10 रुपयाचे कोर्ट फी स्टॅम्प लावणे आवश्यक आहे. ज्या जागेत व्यवसाय करावयाचा आहे, त्या जागेचा मिळकत रजिस्टरचा उतारा अथवा सदर जागा दुसर्‍याची असेल तर जागेचा वापर करण्यास संबंधितांचे स्टॅम्प पेपरवर संमतीपत्र बंधनकारक आहे. जागा सुरक्षिततेबाबत अर्जदार यांचे 100 रुपयाच्या स्टॅम्पवर प्रतिज्ञापत्र साक्षांकित करून सादर करावे. पोलीस निरीक्षक, उपनिरीक्षक यांचा शोभेची दारु व फटाके साठा व विक्री करण्याच्या सुरक्षिततेबाबत आणि दंड व शिक्षा झाली आहे किंवा कसे याबाबतचे प्रमाणपत्र तसेच ना हरकत प्रमाणपत्र व व्यवसायाची जागा सुरक्षित असल्याबाबतचे प्रतिज्ञापत्र सादर करावे, असे प्रसिद्धीपत्रकातून सांगण्यात आले आहे. ग्रामपंचायत किंवा नगरपालिका यांचे ना हरकत प्रमाणपत्र, नगरपालिका हद्दीतील स्टॉलबाबत नगरपालिकेने दुकानासाठी जागा दिल्याच्या पत्राची प्रत, मागील वर्षाच्या परवान्याची झेरॉक्स प्रत सादर करणे आवश्यक आहे. अर्जासोबत परवाना फी 600 रुपये या लेखा शिर्षाखाली शासकीय कोषागारात जमा करून त्याचे मूळ चलन अर्जासोबत जोडावे लागणार आहे. शोभेची दारु व फटाके विक्रीची मुदत ही 22 ऑक्टोबर 2017 अखेरपर्यंत अंमलात राहील. परवान्याची मुदत संपल्यानंतर परवाना धारकांनी शिल्लक राहिलेला माल जवळ ठेवू नये. तो माल कायम स्वरुपाचा परवाना असलेल्या परवाना धारकांजवळ ठेवणे आवश्यक आहे. 15 ऑक्टोबरनंतर सादर केलेल्या परवान्यासाठीच्या अर्जाचा विचार केला जाणार नाही. याची नोंद घ्यावी, असे पत्रकात नमूद करण्यात आले आहे.