टरबूज फोडून फडणवीसांचा निषेध !

जळगाव: राज्याचे विरोधी पक्षनेते माजी मुख्यमंत्री देवेंद्र फडणवीस यांनी शिवसेनेवर टीका करताना महिलांबद्दल वादग्रस्त विधान केले होते. वारीस पठान यांच्या वक्तव्यावरून शिवसेनेने बांगड्या घालाव्यात असे आरोप फडणवीस यांनी केले होते. याचा जळगावात शिवसेनेकडून निषेध व्यक्त करण्यात आला. शिवसैनिकांनी टरबूज फोडून फडणवीस यांनी केलेल्या टीकेचा निषेध केला. दोन दिवसांपूर्वी भाजप नेते देवेंद्र फडणवीस यांनी आदित्य ठाकरे यांच्यावर टीका करताना ‘शिवसेनेच्या कार्यकर्त्यांनी बांगड्या भराव्यात’ असे आक्षेपार्ह वक्तव्य केले होते. या वक्तव्याचे राज्यभर संतप्त पडसाद उमटत आहेत. गुरुवारी दुपारी जळगाव जिल्हा शिवसेनेचे पदाधिकारी तसेच कार्यकर्ते टॉवर चौकात एकत्र जमले होते. त्यांनी फडणवीस यांच्याविरोधात निदर्शने जोरदार घोषणाबाजी केली.

देवेंद्र फडणवीस यांनी आक्षेपार्ह वक्तव्य करत महिलांचा अपमान केला आहे. बांगड्या महिलांचे भूषण मानले जाते. त्यामुळे फडणवीस यांनी केलेल्या वक्तव्याचे समर्थन होऊ शकत नाही. त्यांनी शिवसैनिकांसह महिला वर्गाची माफी मागावी अशी मागणी करण्यात आली आहे. शहर पोलीस ठाण्यात मागणीचे निवेदन देण्यात आले.