फरजाना शेख यांचे नगरसेवक पद रद्द

पुणे । पुणे महापालिका क्षेत्रातील प्रभाग क्रमांक 2 मधील भाजप नगरसेविका फरजाना अय्युब शेख यांच्या जातीचा दाखल जात पडताळणी समितीने अवैध ठरवला आहे. त्यानुसार गुरुवारी महापालिका आयुक्त कुणाल कुमार यांनी शेख यांचे नगरसेवकपद रद्द करण्याचा आदेश जारी केला आहे.

प्रभाग क्रमांक 2 मधून इतर मागासवर्ग महिलेसाठी आरक्षित असलेल्या जागेवरून शेख विजयी झाल्या होत्या. त्यांच्या जात प्रमाणपत्रावर भगवान जाधव व अर्चना कुचेकर यांनी आक्षेप घेतला होता. त्यावर सदानंद पाटील, व्ही. आर. गायकवाड, व्ही. ए. पाटील यांच्या समितीपुढे सुनावणी झाली. त्यानंतर जात स्पष्ट होत नाही, या कारणावरून समितीने त्यांचे प्रमाणपत्र रद्द ठरवले. त्यानुसार कारवाई करत आयुक्तांनी त्यांचे नगरसेवक पद रद्द करण्याचे आदेश काढले आहे.