फिरत्या पथकांसह चित्रीकरण

धुळे । महाराष्ट्र विधान परिषदेच्या नाशिक विभाग शिक्षक मतदारसंघाच्या निवडणुकीसाठी मतदानाच्या वेळेस छायाचित्र असलेले ओळखपत्र आवश्यक आहे. त्यानुसार मतदानासाठी नियुक्त मतदान केंद्राध्यक्ष व संबंधित कर्मचार्‍यांनी दक्षता घ्यावी, असे निर्देश निवडणूक निर्णय अधिकारी तथा नाशिक विभागाचे महसूल आयुक्त राजाराम माने यांनी येथे दिले. नाशिक विभाग शिक्षक मतदारसंघ निवडणूक-2018 चा आढावा घेण्यासाठी शनिवारी जिल्हाधिकारी कार्यालयातील सातपुडा सभागृहात बैठकीचे आयोजन करण्यात आले होते. याप्रसंगी ते बोलत होते. यावेळी सहाय्यक निवडणूक निर्णय अधिकारी तथा जिल्हाधिकारी राहुल रेखावार, जि.प. चे मुख्य कार्यकारी अधिकारी गंगाथरण डी., मनपा आयुक्त सुधाकर देशमुख, पोलिस अधीक्षक एम. रामकुमार, अपर जिल्हाधिकारी डॉ. नंदकुमार बेडसे, निवासी उपजिल्हाधिकारी डॉ. अरविंद अंतुर्लीकर, उपजिल्हाधिकारी तुकाराम हुलवळे, उपविभागीय अधिकारी गणेश मिसाळ, नितीन गावंडे, तहसीलदार अमोल मोरे, संदीप भोसले, सुदाम महाजन, प्रशांत पाटील, रोहिदास वारुडे, शिक्षणाधिकारी प्रवीण अहिरे आदी उपस्थित होते.

तालुकास्तरावर फिरती पथके
उपजिल्हाधिकारी हुलवळे यांनी शिक्षक मतदारसंघ निवडणुकीसाठी सुरू असलेल्या तयारीची माहिती दिली. त्यांनी सांगितले, निवडणुकीची घोषणा झाल्यावर आदर्श आचारसंहिता लागू झाली आहे. जिल्हास्तरावर आदर्श आचारसंहिता कक्ष स्थापन करण्यात आला आहे. तालुकास्तरावर फिरती पथके गठित करण्यात आली आहे. या पथकांसमवेत व्हिडिओग्राफर देण्यात आले आहेत. मतदानासाठी मतदान केंद्राध्यक्ष, मतदान अधिकारी, मतदान कर्मचारी, सूक्ष्म निरीक्षक, सेक्टर ऑफिसर यांची नियुक्ती करण्यात आली आहे. जिल्ह्यात साक्री, शिंदखेडा येथे प्रत्येकी दोन, शिरपूर येथे तीन, तर धुळे येथे पाच मतदान केंद्र असतील. या निवडणुकीसाठी एकूण मतदारांची संख्या 8 हजार 256 एवढी आहे. त्यात पुरुष मतदारांची संख्या 6 हजार 629, तर स्त्री मतदारांची संख्या 1 हजार 627 असल्याचे उपजिल्हाधिकारी हुलवळे यांनी सांगितले.

शिक्षक मतदारांना नैमित्तिक सुटी
रावेळी झालेल्रा शिक्षक मतदारसंघ निवडणुकीच्रा आढावा बैठकीत बोलतांना निवडणूक निर्णय अधिकारी तथा विभागीय आयुक्त माने यांनी सांगितले, नाशिक विभाग शिक्षक मतदारसंघाच्या मतदानासाठी छायाचित्र असलेले ओळखपत्र आवश्यक आहे. मतदानाची वेळ सकाळी 7 ते सायंकाळी 5 वाजेपर्यंत असणार आहे. मतदानासाठी शिक्षक मतदारांना नैमित्तिक सुटी मिळणार आहे. याबाबतची माहिती शिक्षणाधिकारी यांनी शैक्षणिक संस्थांना द्यावी. यावेळी निवडणूक निर्णय अधिकारी माने यांनी निवडणूक प्रशिक्षण, मतपेटी, मतपत्रिका, मतदान कर्मचारी प्रशिक्षण आदींचा सविस्तर आढावा घेतला. तसेच संबंधितांना आवश्रक त्रा सूचना देऊन अंमलबजावणीबाबत निर्देशित केले.