फेक ट्विटर अकाऊंट बनवणारा गजाआड

सारा तेंडुलकरच्या नावे फेक अकाउंट : शरद पवारांवर टीका

मुंबई । क्रिकेटपटू सचिन तेंडुलकर यांची मुलगी सारा हिच्या नावाने फेक ट्विटर अकाउंट बनवण्यात आले होते. ते अकाऊंट बनवणारा सॉफ्टवेअर इंजिनिअर नितीन शिसोदे याला मुंबई पोलिसांनी अटक केली आहे. आरोपीने साराच्या नावाने फेक ट्विटर अकाउंट बनवून राष्ट्रवादी काँग्रेसचे अध्यक्ष शरद पवार यांच्याबद्दल आक्षेपार्ह ट्वीट केले होते. या प्रकरणी सचिन तेंडुलकरने नाराजी व्यक्त करत सायबर सेलकडे तक्रार नोंदवली होती.

पवारांबद्दल केले होते आक्षेपार्ह ट्वीट
सायबर सेलच्या अधिकार्‍यांनी सांगितले की, हे प्रकरण 9 ऑक्टोबर 2017 चे आहे. नितीनने ट्विटरवर साराच्या नावाने फेक अकाउंट बनवले होते. गूगलवरून साराचा फोटो डाउनलोड करून त्याचा वापरही केला होता. या फेक अकाउंटवरून नितीनने शरद पवारांबद्दल आक्षेपार्ह ट्वीट केले होते. हा सॉफ्टवेअर इंजिनिअर असून अंधेरीतील लोकसरिता अपार्टमेंटमध्ये राहातो. विशेष म्हणजे, आरोपीने ट्वीट केले तेव्हा सारा लंडनमध्ये होती. त्यामुळे सचिनच्या स्वीय सचिवाने सायबर पोलिस स्टेशनला याप्रकरणी तक्रार नोंदवली होती. पोलिसांनी इंटरनेट प्रोटोकॉल अर्थात आयपी अ‍ॅड्रेस लोकेट करून आरोपीला बेड्या ठोकल्या होत्या.