फेसबुकसाठी तब्बल 3000 जणांचा सेन्सॉर बोर्ड

मुंबई । फेसबुक हाताळताय तर जरा जपून, कारण आता तुमच्या फेसबूकवर ठेवली जाणार आहे करडी नजर. गैरप्रकार टाळण्यासाठी आता फेसबुकने सेन्सॉर बोर्डाची स्थापना केली आहे. अनेक नेटीझन्स फेसबुकवर भावना भडकवणारे पोस्ट, अश्लील व्हिडीओ पोस्ट करतात. याशिवाय नुकत्याच मुंबईतील ताज हॉटेलमध्ये झालेले आत्महत्येचे फेसबुक लाईव्ह, या सर्व घटनांचा धसका घेऊन फेसबुकने तब्बल 3000 जणांचा सेन्सॉर बोर्ड बनवला आहे.

आक्षेपार्ह पोस्टचा अलर्ट सेन्सॉर बोर्डाला मिळणार
फेसबुकवरील गैरप्रकार रोखण्यासाठी 3 हजार लोकांचा सेन्सॉर बोर्ड नेमल्याचे खुद्द सर्वेसर्वा मार्क झुकरबर्गने सांगितले. त्यामुळे यापुढे जर आक्षेपार्ह व्हिडीओ किंवा पोस्ट फेसबुकवर टाकल्या तर त्याचे अलर्ट सेन्सॉर बोर्डाला मिळेल. जर ती पोस्ट किंवा व्हिडीओ आक्षेपार्ह असेल तर अशा पोस्ट फेसबुकवर अपलोडच होणार नाहीत, असे मार्क झुकरबर्गने स्पष्ट केले.

काही लोक गैरवापर करत सल्याचे उघड
जगभरातील लोक एकमेकांशी जोडले जावेत, मतांची, विचारांची देवाणघेवाण व्हावी, जगभरातील घडामोडींची माहिती मिळावी, यासाठी फेसबुकची निर्मिती झाली होती. पण काही लोक त्याचा गैरवापर करताना दिसतात. धार्मिक विधाने करुन भावना भडकावतात. अश्लील व्हिडीओ पोस्ट करतात. इतकेच नाही तर नुकत्याच आलेल्या फेसबुक लाईव्हवरुन आत्महत्येचे लाईव्ह स्ट्रीमिंगच्याही घटना वाढल्या आहेत. अशा प्रकारांना आळा घालण्यासाठी सेन्सॉर बोर्ड असेल.