फैजपूरची ऐतिहासिक शाळा घाणीच्या साम्राज्यात

जिल्हा परीषद शाळेचे विद्यार्थी जीव मुठीत घेऊन करताय शिक्षण ; महामंडलेश्वर जनार्दन महाराजांकडून पाहणी

फैजपूर- ऐतिहासिक म्युनिसीपल हायस्कूल व जिल्हा परीषद संचलित मराठी शाळा क्रमांक एकला लागून असलेल्या पटांगणाचा परीसरात घाणीचे साम्राज्य पसरले आहे. त्यात विद्यार्थ्यांचा आरोग्याचा प्रश्न निर्माण झाला आहे. यात पटांगण परीसरात काही नागरीकांकडून पक्के बांधकाम, शौचालय पाईप, सांडपाण्याचे पाईप हे सोडण्यात आले असून सर्व प्रकारामुळे नगरपालिका प्रशासन ही बाब गांभीर्याने कधी घेणार ? असा प्रश्न उपस्थित होत आहे. या घाणीमुळे विद्यार्थ्यांचा आरोग्याचा प्रश्न निर्माण झाला आहे. या पटांगणाची सोमवारी महामंडलेश्वर जनार्दन हरी महाराज यांनी पाहणी केली. यावेळी शालेय समिती सभापती शेख कुर्बान, मुख्याधिकारी किशोर चव्हाण, आरोग्य निरीक्षक विपुल साळुंके, मुख्याध्यापक आर.एल.आगळे यांनी पाहणी केली.

कचरा टाकला शाळेच्या आवारात
पाहणी करताना म्युनिसीपल हास्कुलच्या पाठीमागच्या मैदानात तेथील रहिवाशांनी घरातील सर्व कचरा त्या शाळेच्या मैदानात टाकलेला आढळला. त्यातच मराठी मुलांची शाळा क्रमांक एकमध्ये विद्यार्थी शिकत असलेल्या ठिकाणी लागून असलेल्या शौचालयाचा पाईप व मोठ्या प्रमाणात अतिक्रमण व गटारी तुडूंब भरल्या आहेत. विद्यार्थ्यांना शिक्षण घेत असताना त्यांच्या आरोग्याचा जीवाशी खेळ सुरू आहे व मराठी मुलांची शाळेत स्लॅबला गळती लागली आहे. पाऊस सुरू असल्यास संपूर्ण स्लॅबला गळती सुरू असते त्यामुळे शिक्षक ही शिकवायचे कसे ? हा प्रश्न उपस्थित होत आहे तसेच यामुळे जीव मुठीत धरून शिक्षक व विद्यार्थ्यांना शिक्षण घेत आहे.

जिल्हा परीषद प्रशासनाची अनास्था
आज झालेल्या पाहणी दरम्यान शिक्षकांनी सर्व पाहणी करून आरोग्यासाठी काहीतरी पाऊले उचलून स्लॅब दुरुस्तीसाठी गेल्या तीन वर्षांपासून जि.प. शिक्षण विभागाकडे पत्र व्यवहार केला आहे मात्र जिल्हा परीषद शिक्षण विभाग झोपेचे सोंग घेत आहे की, काही अनुचित घटना घडावी याची वाट पाहत आहे ? आतापर्यंत जिल्हा परीषदेकडून अजून कोणतेही प्रतिसाद न मिळाल्याने पालकांनी चिंता व्यक्त केली आहे.

शालेय पोषण आहार शिजतो घाणीच्या साम्राज्यात
सरकारने पहिले ते आठवीपर्यंत मोफत शालेय पोषण आहार सुरू केला आहे. यासाठी की, शाळेतील विद्यार्थी पटसंख्या टिकावी व विद्यार्थी शारीरीक तंदुरुस्त रहावे म्हणून शालेय पोषण आहार सुरू केला असून शाळेची पाहणी केली असता चक्क विद्यार्थ्यांचा शालेय पोषण आहार हा घाणीच्या साम्राज्यात शिजत असल्याचे धक्कादायक चित्र समोर आले आहे. यामुळे विद्यार्थ्यांचे आरोग्य धोक्यात असल्याचे दिसले. ज्या ठिकाणी पोषण आहार शिजवला जातो त्या जागेच्या 10 फूट अंतरावर नागरीकांनी घरातील शौचालयाचे पाईप गटारींमध्ये सोडण्यात आला असून विद्यार्थ्यांना दिवसभर वास सहन करावा लागत आहे. शालेय पोषण आहार शिजत आहे. एकंदरीत विद्यार्थ्यांच्या आरोग्याशी खेळ सुरू आहे? याला कोण जबाबदार राहणार ? असा प्रश्‍न उपस्थित होत आहे.

गटारी नसल्याने नागरीकांनी टाकला पाईप
ज्या नागरीकांनी शाळेच्या मैदान सांडपाण्याचे पाईप सोडले त्यांनी आज नगरपालिकेचे गर्‍हाणे मांडले. नागरीकांनी सांगितले की, पालिकेला वेळोवेळी गटार बांधून द्यावी, अशी मागणी केली मात्र पालिका त्याकडे दुर्लक्ष करीत असून आम्हाला पर्याय नाही पण विद्यार्थ्यांचे आरोग्य लक्षता घेता आम्ही पाईप काढण्यास तयार आहे पण आम्हाला पालिकेने गटारीचे व्यवस्था करून द्यावी, अशी मागणी तेथील रहिवाशांनी केली आहे.

अतिक्रमण धारकांवर कारवाई करणार -सीओ
पालिका शाळेच्या मैदानावर ज्यांनी अतिक्रमण केले आहे त्यांना तत्काळ नोटीसा देण्यात येतील तसेच जे नागरीक घरातील कचरा शाळेच्या मैदानावर टाकत आहे किंवा ज्यांनी सांडपाण्याचे पाईप सोडले आहे अशा सर्वांना तत्काळ नोटिसा देण्यात येतील तसेच ज्या ठिकाणी बंद गटार आहे ती मोकळी करण्याचे आदेश दिल्याचे मुख्याधिकारी किशोर चव्हाण म्हणाले.