फैजपूर पालिकेच्या सभेत रस्त्यांसह गटारींच्या कामांना मंजुरी

फैजपूर- फैजपूर पालिकेच्या शुक्रवारी झालेल्या सर्वसाधारण सभेत शहरातील काही भागातील रस्ते गटारी कामांना मंजुरी देण्यात आली. फैजपूर पालिकेच्या सर्वसाधारण सभेचे आयोजन प्रभारी नगराध्यक्ष रशीद तडवी यांच्या अध्यक्षतेखाली पालिका सभागृहात सकाळी साडेअकरा वाजता करण्यात आले. विषय पत्रिकेवर चर्चेसाठी 17 विषय ठेवण्यात आले. त्यात वैशिष्ट्यपूर्ण योजनेंतर्गत पालिकेच्या मालकीचे सिसनं 3776 मध्ये मुक्तीधामच्या बाजूस असलेली मोकळ्या जागेवर बगीचा विकसीत करून त्यात कंपाउंड हॉल, खेळणी, वॉचमन रूम बांधणे, सन 2020-2021 या वर्षांसाठी पालिकेच्या घनकचरा व्यवस्थापन अंतर्गत घनकचरा संकलन, वाहतूक व प्रक्रिया करणयासह काही भागांमध्ये गटारी, चेंबर, रस्ता काँक्रिटीकरण, रस्ता खडीकरण करणे शहरातील जुना आमोदा रोड, भालोद रस्ता तसेच आसाराम नगर परीसरातील रस्ते डांबरीकरण करून खड्डे बुजण्यासह सतरा विषयांवर विचारविनिमय करून मंजुरी देण्यात आली.

यांची व्यासपीठावर उपस्थिती
व्यासपीठावर प्रभारी नगराध्यक्ष रशीद तडवी, मुख्याधिकारी किशोर चव्हाण तर सभेला भाजपा गटनेता मिलिंद वाघूळदे, नगरसेवक हेमराज चौधरी, काँग्रेस गटनेता कलिम खां मण्यार, राष्ट्रवादी काँग्रेस गटनेता शेख कुर्बान यांच्यासह नगरसेवक, नगरसेविका उपस्थित होते. सभेचे कामकाज बांधकाम विभागाचे वरीष्ठ लिपिक दिलीप वाघमारे, लिपिक सुधीर चौधरी यांनी पाहिले.