‘बबन’ चित्रपट आता थेट पोहोचला सिंगापूरला

मुंबई । ‘कस्संं? बबन म्हणेन तसं’ म्हणत संपूर्ण महाराष्ट्राला खूळ लावणार्‍या तसेच सलग चौथ्या आठवड्यातदेखील हाऊसफुल्ल ठरत असलेल्या ‘बबन’ने आता थेट सिंगापूर गाठले. सिंगापूरच्या मराठी सिनेरसिकांनादेखील या सिनेमाचा आस्वाद घेता यावा, यासाठी तेथील स्थानिक प्रेक्षकांकडून ‘बबन’च्या या खास स्क्रीनिंगची मागणी केली. त्यानुसार 15 एप्रिल रोजी सिंगापूरमधील मराठी प्रेक्षकांसाठी ‘बबन’ची ही भलीमोठी स्क्रिनिंग आयोजित केली जाणार आहे. ग्रामीण जीवनावर आधारित असलेल्या या सिनेमात भाऊसाहेब शिंदे आणि गायत्री जाधव यांची प्रमुख भूमिका आहे.

‘बबन’ सिनेमातील संवाद आणि गाण्यांनादेखील प्रेक्षकांचा मोठा प्रतिसाद लाभत असून, हा सिनेमा मनोरंजनाबरोबरच सामाजिकतेचे अंजनदेखील प्रेक्षकांच्या डोळ्यात घालत आहे तसेच वर्षाच्या मध्यान्हात सर्वाधिक कमाई करणार्‍या मराठी सिनेमाच्या यादीत ‘बबन’चा समावेश झाला आहे. द फोक कोनफ्लूअन्स एन्टरटेंटमेंट प्रस्तुत, चित्राक्ष फिल्म्सनिर्मित आणि भाऊराव नानासाहेब कर्‍हाडे दिग्दर्शित ‘बबन’चा हा गावराण बाणा सिंगापूरमध्येदेखील आपली कमाल दाखवणार हे निश्‍चित!