बबन झोटे करणार आझाद मैदानावर आमरण उपोषण

धुळे । महापालिकेत 1989 साली झालेल्या बोगस भरतीची सीआयडी चौकशी करावी या मागणीसाठी मंत्रालयासमोर आत्मदहनाचा प्रयत्न करणारे तत्कालिन धुळे नगरपालिकेच्या सेवेतून कमी करण्यात आलेले कर्मचारी बबन झोटे हे आता 25 जूनपासून मुंबईतील आझाद मैदानावर आमरण उपोषणास बसणार आहेत. महापालिकेने 1989 मध्ये तत्कालिन राज्यमंत्र्यांनी आर्थिक व्यवहार करून बोगस कर्मचार्‍यांना न्याय दिला. परंतु काही जणांच्या मुलाखती घेऊनही त्यांना नेमणूकीचे स्वतंत्र आदेश न देता बोगस आदेशात नावे टाकून तत्कालिन नगरपालिकेने आपली फसवणूक केल्याचा आरोप बबन झोटे यांनी केला आहे.

…अन्यथा मनपा जबाबदार
राज्यमंत्र्यांच्या आदेशाने जे बोगस कर्मचारी सेवेत सामावून घेतले याची जाणीव ठेवून मनपाने कामगार न्यायालयाच्या आदेशाला उच्च न्यायालयात आव्हान देण्याचे कारण नव्हते. पण आस्थापनाप्रमुखांची मागणी पूर्ण न केल्याने आमचे नुकसान करण्यात आले, असे बबन झोटे यांच्या निवेदनात नमुद आहे. दरम्यान, मुख्यमंत्री कार्यालयाने, आपले निवेदन दिशाभूल करणारे असल्याचा खुलासा केला असला तरी आपली मागणी स्वच्छ व सत्य असून बोगस भरतीच्या सीआयडी चौकशीचे आदेश होत नाही तोपर्यंत संघर्ष सुरू ठेवणार असल्याचे निवेदन मुख्यमंत्र्यांना पाठविले आहे़ सीआयडी चौकशीच्या मागणीसाठी 25 जूनपासून मुंबईतील आझाद मैदानावर जलग्रहण करून आमरण उपोषणास बसणार आहे.