बाजार समितीच्या 18 जागांसाठी 42 उमेदवार

बीड । परळी कृषी उत्पन्न बाजार समितिच्या निवडणुकांसाठी 8 केंद्रांवर मतदान होत आहे. ग्रामविकास मंत्री पंकजा मुंडे आणि विधान परिषदेचे विरोधी पक्षनेते धनंजय मुंडे पुन्हा एकदा एकमेकांसमोर उभे ठाकले आहेत. 18 जागांसाठी 42 उमेदवार रिंगणात आहेत. 1 हजार 900 मतदार मतदानाचा अधिकार बजावतील.पराभव टाळण्यासाठी पंकंजा मुंडे आणि धनंजय मुंडे यांनी आपले मतदार सहलीला पाठवल्याचा आरोप होत आहे. हेे मतदार सकाळीच परळीत दाखल झाले.

दोघांकडूनही पॅनलला पित्यांची नावे
पंडित अण्णांनी बंडखोरी केल्यानंतर या बाजार समितीवर धनंजय मुंडेंनी एकहाती अंमल ठेवला. आता गोपीनाथ मुंडे आणि पंडितअण्णा हयात नाहीत. त्यांच्या पश्चात होणार्‍या या निवडणुकीत पंकजा मुंडे यांनी आपल्या पॅनलला गोपीनाथ मुंडे यांचे नाव दिले आहे, धनंजय यांनी आपल्या पॅनलला पंडितअण्णा यांचे नाव दिले आहे. परळी नगरपालिका ताब्यात ठेवण्यात धनंजय मुंडेंना यश मिळाल्यानंतर धनंजय मुंडेंच्या राजकीय महत्वाकांक्षा वाढल्या आहेत. जिल्हा परिषद आणि पंचायत समितीच्या निवडणुकीतही पंकजा मुंडेंचा मोठा पराभव धनंजय मुंडेंनी केला होता. भाजपविरोधात राष्ट्रवादी आणि काँग्रेस आघाडी करुन ही निवडणूक लढत आहेत. धनंजय मुंडेंनी ही बाजार समिती नफ्यात आणल्याचा दावा राष्ट्रवादीचा आहे. जिल्हा परिषद निवडणुकीत पंकजा मुंडेंना एकही जागा जिंकता आली नव्हती, तरीही राष्ट्रवादीच्या सुरेश धस यांना फोडून तडजोडीतून जिल्हा परिषद ताब्यात घेतली. हा राजकीय संघर्ष राज्यात लक्षवेधी आहे.