बाबा काल्याविरुद्ध अखेर गुन्हा
तिघा पोलिस कर्मचार्‍यांविरुद्ध कसुरी अहवाल जिल्हा पोलिस अधीक्षकांकडे रवाना
भुसावळ- शौचाचा बहाणा करीत भुसावळ न्यायालयातूनच कुविख्यात बाबा काल्या या आरोपीने पोलिसांच्या हातावर तुरी देत पळ काढल्याची घटना शुक्रवारी दुपारी तीन वाजेच्या सुमारास घडली होती. या प्रकरणी रात्री उशिरापर्यंत शहर व परीसरात आरोपीचा शोध घेतल्यानंतरही तो मिळून न आल्यानंतर रात्री उशिरा जेलचे कर्मचारी प्रकाश पाटील यांनी शहर पोलिसात फिर्याद दिल्यावरून आसीफ बेग उर्फ बाबा काल्या असलम बेगविरुद्ध गुन्हा दाखल करण्यात आला. दरम्यान, आरोपी पोलिसांच्या तावडीतून पळाल्याने व बंदोबस्तात कसुरी राहिल्याने जळगाव कारागृहाच्या तिघाही कर्मचार्‍यांनी कर्तव्यात कसुरी केल्याबाबतचा अहवाल शहर पोलिसांनी जिल्हा पोलिस अधीक्षकांकडे पाठवला आहे. लवकरच या कर्मचार्‍यांचे निलंबन होण्याची दाट शक्यता आहे.
शौचाचा बहाणा करीत काढला होता पळ
जबरी चोरी, रस्ता लुटीसह शरीराविरुद्ध हल्ला केल्याचे तब्बल सहा गुन्हे दाखल असलेल्या बाबा काल्याने 5 जुलै रोजी रजा चौक परीसरात अरबाज शकील आझाद (22) यास लुटले होते तर खिशातील रक्कम काढताना विरोध झाल्याने आरोपीने अरबाजवर चाकू हल्ला करून पळ काढला होता त्यानंतर गोपनीय माहितीवरून आरोपीस 17 जुलै रोजी अटक करण्यात आली होती. पोलिस कोठडी संपल्यानंतर त्याची जळगावच्या कारागृहात रवानगी करण्यात आली. शुक्रवारी न्यायालयीन कामानिमित्त आरोपी बाबा काल्यासहकलीम शेख या दोघांना घेवून जळगाव कारागृहातील प्रवीण पाटील, विकास पाटील व प्रवीण जाधव हे कर्मचारी घेवून आले होते. दुपारी तीन वाजेच्या सुमारास आरोपीने शौचास जाण्याचा बहाणा करीत शौचालयाच्या खिडकीच्या काच काढून पोबारा केला होता. या घटनेने जिल्ह्यात मोठी खळबळ उडाली होती.
कर्तव्यात कसुरी झाल्याचा ठपका
पोलिसांच्या तावडीतून आरोपी पसार झाल्याने कर्तव्यात कसुरी झाल्याचा ठपका ठेवत जळगाव कारागृहातील कर्मचारी प्रवीण पाटील, विकास पाटील व प्रवीण जाधव यांच्याविरुद्ध जिल्हा पोलिस अधीक्षक डॉ.पंजाबराव उगले यांच्याकडे शहर पोलिस ठाण्याचे निरीक्षक बाबासाहेब ठोंबे यांनी शनिवारी अहवाल पाठवला आहे. एक-दोन दिवसात या पोलिसांचे निलंबन होण्याची दाट शक्यता आहे. दरम्यान, पोलिसांच्या तावडीतून आरोपी पळाल्याप्रकरणी प्रकाश पाटील यांच्या फिर्यादीनुसार शुक्रवारी रात्री उशिरा शहर पोलिसात गुन्हा दाखल करण्यात आला. तपास हवालदार साहिल तडवी करीत आहेत.