बारामतीतील शेतकरी होणार थकबाकीमुक्त

बारामती । महावितरणच्या बारामती मंडलांतर्गत बारामती, इंदापूर, दौंड, शिरूर, पुरंदर व भोर तालुक्यांतील सुमारे दीड लाखांहून अधिक शेतकर्‍यांना मुख्यमंत्री कृषी संजीवनी योजनेद्वारे वीजबिलाच्या थकबाकीतून मुक्त होण्याची संधी मिळाली आहे. राज्य शासनाने जाहीर केलेल्या मुख्यमंत्री कृषी संजीवनी योजनेत 31 मार्च 2017 पर्यंत असलेल्या मूळ थकबाकीचा हप्त्यांनी भरणा केल्यास व्याज व दंड माफ केले जाणार आहे.

सुट्टीच्या दिवशीही सुरू राहणार वीजबिल भरणा केंद्रे
थकबाकी व चालू वीजबिलांचा ग्राहकांना भरणा करता यावा म्हणून बारामती, इंदापूर, दौंड, शिरूर, पुरंदर, भोर तालुक्यातील महावितरणची सर्व अधिकृत वीजबिल भरणा केंद्रे 12 व 14 नोव्हेंबर रोजी सुट्टीच्या दिवशी सुरू राहणार आहेत. थकीत देयकांचा भरणा करणे सोयीचे व्हावे, यासाठी रविवारी (दि. 12) व मंगळवारी (दि. 14) सार्वजनिक सुट्टी असली तरी बारामती मंडलातील महावितरणची सर्व अधिकृत वीजबिल भरणा केंद्रे कार्यालयीन वेळेत सुरू राहणार आहेत.

वीजबिल न मिळाल्यास संपर्क साधण्याचे आवाहन
मुख्यमंत्री कृषी संजीवनी योजनेसाठी थकबाकीदार कृषीपंपधारकांना विशेष वीजबिल देण्यात येत आहे. यामध्ये संबंधित ग्राहकाकडे असलेली मूळ थकबाकी व त्यासाठी हप्त्यांची संख्या व रक्कम याबाबतची माहिती या विशेष वीजबिलात देण्यात आलेली आहे. वीजबिल वाटपाची प्रक्रिया वेगाने सुरू आहे. जून-2017 चे त्रैमासिक चालू वीजबिल भरून 15 नोव्हेंबरपर्यंत या योजनेत सहभागी व्हावे लागणार आहे. वीजबिल न मिळाल्यास थकबाकीदार कृषीपंपधारकांनी महावितरणच्या संबंधित कार्यालयाशी त्वरित संपर्क साधावा, असे आवाहन महावितरणने केले आहे.

1 लाख ग्राहकांकडे 754 कोटींची थकबाकी
बारामती, इंदापूर, दौंड, शिरूर, पुरंदर व भोर तालुक्यांतील 1 लाख 59 हजार 323 ग्राहकांकडे 754 कोटी 81 लाख रुपयांची थकबाकी आहे. त्यातील 526 कोटी 68 लाख रुपयांची मूळ थकबाकी दिलेल्या हप्त्यात चालू वीजबिलांसह भरल्यास 211 कोटी 55 लाख रुपयांचे व्याज व 6 कोटी 58 लाख रुपयांचा दंड माफ करण्याचा शासनाचा विचार आहे. ज्या कृषीपंपधारकांकडे 30 हजार रुपयांच्या आत थकबाकी आहे, अशा ग्राहकांना 5 सुलभ हफ्ते तर ज्या कृषीपंपधारकांकडे 30 हजार रुपयांपेक्षा जास्त थकबाकी आहे, अशा ग्राहकांना मूळ थकबाकी भरण्यासाठी 10 सुलभ हफ्ते मिळणार आहेत.

थकबाकी वसुलीसाठी धडक मोहीम
वीजबिलांच्या थकबाकीचे प्रमाण वाढल्यास महावितरणला आर्थिक प्रश्‍नांना सामोरे जावे लागण्याची शक्यता आहे. त्यामुळे दरमहा वीजबिलांसह वीजग्राहकांकडे असलेल्या थकबाकीची वसुली करण्यासाठी महावितरणने मंगळवारपासून धडक मोहीम राबविण्यास सुरुवात केली आहे. त्यानुसार बारामती परिमंडलातील बारामती, सातारा व सोलापूर या तिन्ही मंडलात थकीत वीजबिलांच्या वसुलीसाठी वीजपुरवठा खंडित करण्याची मोहीम तीव्र झाली आहे. यात वारंवार आवाहन करूनही थकीत वीजबिल न भरणार्‍या 10 हजार 469 थकबाकीदारांचा वीजपुरवठा गेल्या 4 दिवसांत खंडित करण्यात आला आहे. या ग्राहकांकडे 3 कोटी 94 लाख रुपये थकीत आहेत. वीजबिलांबाबत ग्राहकांच्या तक्रारी असल्यास त्याचे त्वरित निराकरण करण्यात येणार आहे. थकीत वीजबिलांचा भरणा करण्यासाठी स्थानिक वीजबील भरणा केंद्रांसह व घरबसल्या ऑनलाईन पेमेंटसाठी महावितरणची www.mahadiscom.in ही वेबसाईट तसेच महावितरणच्या मोबाईल अ‍ॅपचा पर्याय उपलब्ध आहे.