बारामुल्लातील स्फोटात 4 पोलिस शहीद

श्रीनगर : जम्मू-काश्मीरमधील बारामुल्ला जिल्ह्यातील सोपोर भागात दहशतवाद्यांनी घडवून आणलेल्या आयईडी स्फोटात चार पोलिस शहीद झाले. एएसआय इरशाद अहमद, मोहम्मद अमीन आणि गुलाम नबी, अशी शहीद पोलिसांची नावे आहेत. एका जवानाचा उपचार सुरू असताना मृत्यू झाला. तसेच अनेक पोलीस जखमी झाले असून त्यांना उपचारासाठी श्रीनगर येथे उपचारासाठी हलविण्यात आले आहे. या हल्ल्याची जबाबदारी जैश-ए-महम्मद या दहशतवादी संघटनेने स्वीकारली आहे.

बंददरम्यानची घटना
सोपोर येथील छोटा आणि बडा बाजारच्या मध्ये असलेल्या एका गल्लीत दहशतवाद्यांनी तीव्र क्षमतेची स्फोटके ठेवली होती. सकाळी पावणेदहाच्या सुमारास त्याचा स्फोट झाला. या स्फोटात चार पोलिसांचा जागीच मृत्यू झाला. फुटीरतावाद्यांनी शनिवारी सोपोर बंदचे आवाहन केले होते. त्या पार्श्वभूमीवर या भागात मोठ्या प्रमाणावर पोलीस बंदोबस्त होता. पोलीस कर्मचारी गस्त घालत असतानाच हा स्फोट झाला.

सीआरपीएफ, एसओजीची शोधमोहीम
या घटनेनंतर पोलिसांनी संपूर्ण परिसराला वेढा दिला. लष्कर, सीआरपीएफ व एसओजी जवानांनी शोधमोहीम हाती घेतली होती. मुख्यमंत्री मेहबुबा मुफ्ती यांनी या घटनेचा तीव्र निषेध करत पोलिसांच्या मृत्यूबद्दल दु:ख व्यक्त केले आहे. काश्मीर खोर्‍यात दहशतवाद्यांच्या विरोधात लष्कराने ऑपरेशन ऑलआऊट सुरु केले आहे. यामध्ये आतापर्यंत 200 हून जास्त दहशतवाद्यांना कंठस्नान घालण्यात आले आहे.