बारावीच्या परीक्षेवर शिक्षकांच्या बहिष्काराचे सावट

पिंपरी (प्रतिनिधी) – माध्यमिक व उच्चमाध्यमिक शिक्षण मंडळातर्फे घेण्यात येणार्‍या बारावीच्या परीक्षा 21 फेब्रुवारीपासून आणि प्रात्यक्षिक परीक्षा पाच फेब्रुवारीपासून सुरू होत आहेत. परीक्षेचे हॉलतिकीट 30 जानेवारीपासून वितरित करण्यात येणार आहेत. तथापि, या परीक्षांवर शिक्षकांच्या बहिष्काराचे सावट कायम आहे, अशी माहिती शिक्षक संघटनांच्यावतीने देण्यात आली.

मंडळ म्हणजे परीक्षा सुरळीत होईल
दहावी, बारावी परीक्षांचे वेळापत्रक मंडळाने जाहीर केले. मंडळाच्या परीक्षांवर ज्युनिअर कॉलेजच्या शिक्षकांनी बहिष्कार टाकण्याची भाषा सुरू केली. दोन फेब्रुवारी रोजी ज्युनिअर कॉलेज बंद पाळणार आहेत, तर प्रात्यक्षिक परीक्षा न घेण्याचे शिक्षकांकडून सांगण्यात येत आहे. त्यावर मंडळ अधिकार्‍यांनी सावध पाऊले उचलित प्रात्यक्षिक परीक्षा सुरळीत होतील, असे सांगितले. परीक्षार्थींना मंडळाकडून 30 जानेवारीपासून विद्यार्थ्यांना हॉलतिकिटांचे वाटप करण्यात येणार आहेत.

संघटना बंदवर ठाम
फेब्रुवारी-मार्चमध्ये घेण्यात येणार्‍या बारावी परीक्षेचे प्रवेशपत्रे व प्रात्यक्षिक परीक्षा साहित्य 30 जानेवारीरोजी मंडळातर्फे वितरित करण्यात येणार आहे. सर्व जिल्ह्यांच्या वितरण केंद्रावर सकाळी 11 ते सायंकाळी पाच या वेळेत हे वितरण करण्यात येणार आहे. ज्युनिअर कॉलेजांनी याची नोंद घ्यावी असे विभागीय मंडळाच्या सचिवांनी आवाहन केले आहे. शासनाकडे ज्युनिअर कॉलेजस्तरावरील अनेक प्रश्‍न प्रलंबित आहे. त्याबाबत शासनस्तरावर आमचा पाठपुरवा सुरू आहे, परंतु केवळ आश्‍वासन दिले जाते. त्यामुळे राज्यपातळीवर आम्ही दोन फेब्रुवारी रोजी ज्युनिअर कॉलेज बंद पाळत आहोत. त्यानंतर काय तो निर्णय होईल, अशी माहिती ज्युनिअर कॉलेज संघटनेच्यावतीने देण्यात आली आहे.