बाळासाहेबांचे फोटो वापरून भाजपा वाढला: संजय राऊत

मुंबई: भाजपा आणि शिवसेना पक्षांची फारकत झाल्यानंतर दोन्ही पक्षातील कलगीतुरा वाढताना दिसत आहे. आजच शिवसेना पक्षाने जीएसटी वरून केंद्रातील भाजपा सरकारला फटकारले आहे. तर दुसरीकडे शिवेसेनेचे खा. संजय राऊत यांनी एका खाजगी वृत्तवाहिनीला दिलेल्या मुलाखतीत भाजपावर निशाणा साधला आहे. भारतीय जनता पक्ष हा महाराष्ट्रात शिवसेना प्रमुख बाळासाहेब ठाकरे यांचे फोटो वापरूनच वाढला आहे. कोणी कोणाचे फोटो वापरणं हा गुन्हा नाही, असं मत शिवसेनेचे नेते खासदार संजय राऊत यांनी मुलाखतीत सांगितले.

देवेंद्र फडणवीस यांनी आदर्श विरोधीपक्ष नेते म्हणून काम करावं. महाराष्ट्राला आदर्श विरोधी पक्षनेतेपदाची परंपरा आहे. अनेक दिग्गजांनी योग्यरित्या ही जबाबदारी पार पाडली. राज्यात भाजपानंच शिवसेनेचे उमेदवार पाडले, याची माहितीही आमच्याकडे उपलब्ध आहे, असं राऊत यांनी स्पष्ट केलं. राज्यात आम्ही जर वेगळे लढलो असतो तर शंभरी गाठली असती असेही ते यावेळी म्हणाले.

बैलगाडी सरकार किंवा ऑटोरिक्षा सरकार असेल तरी कोणाला कमी लेखू नये. आम्ही कोणत्याही परीक्षेला सामोरे जाण्यासाठी तयार आहोत. आम्ही कासवाच्या गतीनं जाऊ पण टप्पा पार करू,असा विश्वास राऊत यांनी व्यक्त केला. आम्ही कोणावरही व्यक्तीगत टीका करत नाही. आम्ही धोरणांवर टीका करतो. पण काही जणांकडून देशाच्या माजी पंतप्रधानांवरही टीका केली जाते. हा देश गेल्या पाच वर्षांमध्ये उभा राहिला नाही. गेल्या ६० वर्षांमध्ये करण्यात आलेल्या अथक प्रयत्नांमुळे हा देश उभा राहिला आहे. संजय राऊतांच्या या प्रतिक्रियेवर भाजपा काय प्रतिक्रिया देते हे पाहणे महत्वाचे ठरेल.