बाळासाहेब ठाकरे रुग्णालयातील ‘डायलेसीस’चा मार्ग मोकळा

लायन्स क्लबसोबत १० वर्षांचा करार

पुणे । मित्रमंडळ चौकातील हिंदूहृदयसम्राट बाळासाहेब ठाकरे दवाखान्यात डायलेसिस सेंटर चालविण्यासाठी लायन्स क्लब ऑफ पुना नेत्र प्रतिष्ठानसोबत दहा वर्षांसाठी करार करण्यास महापालिकेच्या आरोग्य विभागाने सकारात्मक अभिप्राय दिला आहे. या प्रकल्पांतर्गत डायलेसिससाठी प्रतिरुग्ण ४०० रुपये शुल्क आकारण्यात येणार आहे, तर पालिकेच्या शहरी गरीब योजनेचे कार्ड असलेल्या रुग्णांना अवघ्या २०० रुपयांमध्ये डायलेसिस करता येणार आहे. या अभिप्रायावर आता स्थायी समितीच्या पुढील बैठकीत चर्चा होणार आहे.

शहरातील किडनीच्या आजाराने ग्रस्त असलेल्या रुग्णांना डायलेसिसचे उपचार घ्यावे लागतात. ही सेवा अत्यंत महागडी असल्याने आर्थिकदृष्ट्या गरीब रुग्णांना हे उपचार परवडत नाहीत. त्या पार्श्‍वभूमीवर लायन्स क्लब ऑफ पुणे मुकुंदनगर चॅरिटेबल ट्रस्ट यांच्या मदतीने महापालिकेच्या वतीने कमला नेहरू हॉस्पिटलमध्ये अवघ्या ४०० रुपयांमध्ये ही सुविधा उपलब्ध करून दिली जाते. तसेच पालिकेच्या शहरी गरीब योजनेचे कार्ड असलेल्या पेशंटला अवघ्या २०० रुपयांमध्ये डायलसीस करता येते. त्याचा आतापर्यंत ८ हजार रुग्णांना फायदा झाला आहे. त्या धर्तीवर मित्रमंडळ चौकातील हिंदूहृदयसम्राट बाळासाहेब ठाकरे दवाखान्यात (लायन्स गोल दवाखाना) महापालिका आणि लायन्स क्लब ऑफ पुना नेत्र प्रतिष्ठानच्या वतीने संयुक्तरीत्या डायलसीस प्रकल्प चालविण्यासाठी करार करण्यात यावा, असे पत्र महेश लडकत आणि योगेश समेळ यांनी दिले होते.

१५०० चौरस फूट जागेवर सेंटर
स्थायी समितीने आरोग्य विभागाकडे अभिप्राय मागितला होता. त्यावर डायलेसिस सेंटर चालविण्यासाठी लायन्स क्लब ऑफ पुना नेत्र प्रतिष्ठानसोबत दहा वर्षांसाठी करार करण्यात यावा, या प्रकल्पासाठी बाळासाहेब ठाकरे दवाखान्यातील १५०० चौरस फूट जागा विनामोबदला उपलब्ध करून देण्यात यावी, आवश्यक असलेले तज्ज्ञ, डॉक्टर, तंत्रज्ञ तसेच इतर कर्मचारी वर्ग हा लायन्स क्लबच्या वतीने उपलब्ध करून देण्यात यावा, असा सकारात्मक अभिप्राय आरोग्य विभागाने दिला आहे.