‘बाहूबली’वरुन क्रीडा समिती उपसभापतींचे राजीनामा नाट्य!

पिंपरी-चिंचवड : महापालिकेच्या क्रीडा समिती उपसभापतींचे राजीनामा नाट्य शुक्रवारी रंगले. क्रीडा समितीचे विषय स्थायी समिती तहकूब ठेवत असल्याचे कारण देत बाळासाहेब ओव्हाळ यांनी अगोदर उपसभापती पदाचा राजीनामा दिला असल्याचे सभापती लक्ष्मण सस्ते यांनी सांगितले. दरम्यान, एका आमदार नेत्याकडेकडे जाऊन आल्यानंतर त्यांनी राजीनामा देण्याच्या तयारीत होतो. परंतु, दिला नाही, अशी सारवा-सारव केली.

महापालिकेत भाजपची सत्ता आल्यानंतर विषय समितीच्या उपसभापतींची नेमणूक करण्यात सुरुवात केली. रिपब्लिकन पक्षाचे कट्टर कार्यकर्ते असलेले आणि भाजपच्या चिन्हावर महापालिका निवडणुकीत प्रभाग क्रमांक 16 मामुर्डी, किवळे, रावेत परिसरातून निवडून आलेल्या ओव्हाळ यांची क्रीडा समितीच्या उपसभापती निवड झाली. क्रीडा समितीच्या मागील पाक्षिक सभेत निगडी, प्राधिकरण येथील महापालिकेची ‘बाहूबली’ व्यायामशाळा नवनाथ मित्र मंडळास सेवाशुल्क तत्वावर 11 महिने चालविण्यास द्यावी, असा ठराव केला होता. तो ठराव मंजुरीसाठी स्थायी समितीकडे पाठविला. मात्र, स्थायी समितीने तो ठराव तहकूब केला.

त्यामुळे ओव्हाळ यांनी राजीनामा दिला असल्याचे, सभापती सस्ते यांनी पत्रकारांशी बोलताना सांगितले. दरम्यान, काही पदाधिकारी आणि ओव्हाळ एका आमदार नेत्याकडे गेले. त्यानंतर आपण राजीनामा दिला नाही, तर देण्याच्या तयारीत होतो, अशी सारवा-सारव ओव्हाळ यांनी केली. तसेच क्रीडा समितीला काहीच अधिकार नाहीत. समितीचे विषय स्थायी समिती सभेत परस्पर बदलले जातात. त्याची क्रीडा समितीला कोणतीही कल्पना दिली जात नाही. विश्‍वासात घेतले नाही, असेही ते म्हणाले. स्थायी समितीच्या सभापती सीमा सावळे म्हणाल्या, ‘बाहूबली’ व्यायामशाळेचा ठराव दोन महिन्यांपूर्वीच मंजूर केला आहे. त्यामुळे तो विषय मंजूर केल्यानंतर पुन्हा सहा महिने मंजूर करता येत नाही. ‘बाहूबली’ व्यायाम शाळेचा विषय पुन्हा स्थायी समितीसमोर आला. त्यावेळी स्थायी समिती सदस्य असलेल्या स्थानिक नगरसेवकांनी त्याला विरोध केला. तसेच कायद्यावर बोठट ठेवले. सभागृह नेते एकनाथ पवार म्हणाले, क्रीडा समिती उपसभापती बाळासाहेब ओव्हाळ यांचा राजीनामा माझ्याकडे आला नाही. त्यांचे काय म्हणने असेल ते ऐकूण घेण्यात येईल. त्यांचे समाधान करण्याचा प्रयत्न केला जाईल.