बीएसएफ जवान खातात निकृष्ट अन्न!
नवी दिल्ली : लष्कराकडून मिळणार्‍या निकृष्ट जेवणाचा व्हिडिओ सोशल मीडियावर व्हायरल झाल्याने लष्कराची लक्तरे वेशीवर टांगली गेली आहेत. बीएसएफचा जवान तेज बहादूर याने हा व्हिडिओ सोशल मीडियावर टाकून न्याय मिळण्यासाठी पंतप्रधान व देशाला विनंती केली आहे. जवानाने लष्करी अधिकार्‍यांवर गंभीर आरोप केले आहेत. व्हिडिओमुळे देशात खळबळ उडाल्यानंतर बीएसएफने तेज बहादूरला मुख्यालयात बोलवून घेतले असून, त्याला मनोरुग्ण ठरविण्याचा प्रकार सुरू केला आहे. त्यामुळे सर्वत्र संताप व्यक्त होत आहे. दरम्यान, गृहमंत्री राजनाथसिंह यांनी प्रकरणाच्या चौकशीचे आदेश दिले असून, बीएसएफला अहवाल देण्यास सांगितले आहे. देशातील प्रसिद्ध खेळाडूंनीही या प्रकाराबद्दल नाराजी व्यक्त केली आहे. जम्मू-काश्मीरमध्ये कार्यरत असलेला बीएसएफचा जवान तेज बहादूर या व्हिडिओत म्हणतो की, आम्ही सीमेवर बिकट परिस्थितीत देशाची सेवा करतो आणि वरिष्ठ अधिकारी सामान बाजारात विकतात. अनेकवेळा तर उपाशी झोपावे लागते. अतिशय निकृष्ट असे जेवण दिले जात असल्याने काम करणे त्रासदायक ठरत आहे.
व्हिडिओत जवान काय म्हणाला…
देशवासीयांनो, मला एक विनंती करायची आहे. मी 29 बाटालियनचा सीमा सुरक्षा दलाचा जवान आहे. आम्ही सकाळी 6 वाजेपासून ते संध्याकाळी पाचपर्यंत 11 तास सतत बर्फात उभे राहून देशाचे रक्षण करतो. अनेकवेळा जवानांना उपाशीच झोपावे लागते. मी सकाळचा नाश्ता तुम्हाला दाखवतो. एक पराठा मिळतो, त्यासोबत चटणी, लोणचे, भाजी काहीच मिळत नाही, पराठा आम्हाला चहासोबत खावा लागतो. दुपारचे जेवण मी तुम्हाला दाखवतो. वरणात केवळ मीठ आणि हळद असते, त्याव्यतिरिक्त काहीच नसते. चपात्या तर अतिशय निकृष्टदर्जाच्या असतात. माझ्या मागचे दृष्य तुम्हाला दिसत असेल. तुम्हाला कदाचित ते दृष्य चांगले वाटत असेल. पण आमची परिस्थिती मीडियाही दाखवत नाही आणि मंत्रीही सांगत नाहीत. मी यानंतर तुम्हाला तीन व्हिडिओ पाठवणार आहे. ते तुम्ही देशातील सर्व मीडिया आणि नेत्यांना दाखवा.
दरम्यान, तेज बहादूर हा मनोरुग्ण असून त्याला समुपदेशनाची गरज आहे. त्याची वर्तणूक चांगली नाही, अशी सारवासारव बीएसएफकडून करण्यात आली आहे. मात्र त्यास जवानाने चोख रोखठोक उत्तर दिले आहे.
सरकार सर्व काही देते पण…
तेज बहादूर म्हणतो, वरिष्ठ अधिकारी आमच्यावर खूप अन्याय, अत्याचार करतात. आम्ही कोणत्याच सरकारला दोष देत नाही. कारण, सरकार प्रत्येक वस्तू आम्हाला देते, परंतु वरिष्ठ अधिकारी सर्व विकून मोकळे होता. आमच्यापर्यंत ते काहीच येऊ देत नाहीत. मी परत सांगतोय की, भारत सरकार सर्वकाही देते, त्यांच्याकडून सर्वकाही येते. स्टोअर भरलेले आहेत, पण सर्वकाही बाजारात विकले जाते. ते कोठे जाते? त्याची विक्री कोण करते? याची चौकशी व्हावी. जवान तेज बहादूर याने पंतप्रधानांना विनंती केली आहे की, या प्रकाराची चौकशी करावी. हा व्हिडिओ टाकल्यानंतर कदाचीत मी असेन किंवा नसेन. कारण या अधिकार्‍यांचे हात खूप लांब आहेत. ते मला काहीही करू शकतात. काहीही होऊ शकते, तुम्ही विचार करा. या व्हिडिओला जास्तीत-जास्त शेअर करा. मीडियाने येथे येऊन चौकशी करावी. येथील परिस्थिती पाहावी.
तेज बहादूर मनोरुग्ण : बीएसएफ
तेज बहादूर यांच्या आरोपावर बीएसएफने स्पष्टीकरण न देता तो मनोरुग्ण असल्याचे म्हटले आहे. तसेच त्यास समुपदेशनाची गरज असल्याचेही म्हटले आहे. तेज बहादूर हा दारुबाज आहे. अधिकार्‍यांसोबत गैरवर्तन आणि नियमांचे पालन न करणारा जवान आहे. त्याला बहुतेकवेळा हेडक्वॉर्टरमध्येच ड्यूटी दिली जाते. 10 दिवसांपूर्वीच त्याला पोस्टवर पाठवले गेले होते. त्या पोस्टवर आणखी 20 जवान आहेत, परंतु त्यांची काहीही तक्रार नाही, असे बीएसएफने म्हटले आहे. बीएसएफने मनोरुग्ण असल्याचा आरोप या जवानावर केल्यानंतर त्याने बीएसएफलाच सवाल केले आहेत. मी मनोरुग्ण होतो तर लष्कराने पुरस्काराने मला सन्मानित का केले होते? माझ्यावर गैरकृत्याचा आरोप असेल तर त्यामागचे कारण देखील लष्कराने स्पष्ट करावे.