बेंचवर उभे केल्याने 12वीच्या विद्यार्थिनीची आत्महत्या

धुळे । खासगी क्लासमध्ये उशिरा आल्यामुळे शिक्षकाने बेंचवर उभे करून अपमान केला. हा अपमान सहन झाला नाही म्हणून बारावी सायन्सचे शिक्षण घेणार्‍या महाविद्यालयीन युवतीने गळफास लावून आत्महत्या केली. उन्नती संजय महाले (वय- 17) असे आत्महत्या केलेल्या विद्यार्थिनीचे नाव आहे. ती जयहिंद सीनिअर कॉलेजमध्ये शिकत होती. याप्रकरणी दोषी शिक्षकाला अटक करण्याची मागणी विद्यार्थिनीच्या नातेवाईकांनी केली. उन्नती ही देवपूर दत्त मंदिर परिसरातील संकल्प क्लासेसमध्ये सोमवारी सकाळी उशिरा पोहोचली. त्यामुळे तीला शिक्षकाने तिला बेंचवर तासभर उभे केले. तो अपमान सहन झाल्यामुळे तिने रूमवर येऊन आत्महत्या केली.

तिने वैयक्तिक डायरीत केल्या नोंदी
उन्नतीला डायरीत नोंद करण्याची सवय होती. तिने क्लासमधील इतर गोष्टींच्या नोंदी एका डायरीत केल्या आहेत. त्यात क्लासमध्ये संबंधित शिक्षकाकडून मिळणार्‍या वागणुकीबाबत नोंदी आहेत. ही डायरी घटनेनंतर पोलिसांनी ताब्यात घेतली होती. या डायरीत संबंधित शिक्षकांची नावे असल्याचे समजते. मात्र गुन्हा दाखल नसल्याने पोलिसांनी त्याबाबतची अधिक माहिती देण्यास नकार दिला.

वडील होते प्राध्यापक, मैत्रीणीकडून घटना उघडकीस
याबाबत तिची मैत्रीण आकांक्षा गोकूळ भदाणे हिने दिलेल्या माहितीवरून पश्‍चिम देवपूर पोलिस ठाण्यात अकस्मात मृत्यूची नोंद करण्यात आली आहे. मात्र, सायंकाळी नातेवाइकांनी पोलिस अधीक्षकांची भेट घेऊन जोपर्यंत दोषी शिक्षकाला अटक करीत नाही तोपर्यंत मृतदेह ताब्यात घेणार नसल्याची भूमिका घेतली. निजामपूर येथील आदर्श कॉलेजमध्ये प्राध्यापक संजय वसंत महाले यांची उन्नती ही मुलगी होती.