बोगस कागदपत्रे तयार करणार्‍या चौघांना अटक
भिवंडी । रिक्षा परमिट आणि वाहन चालविण्याचा परवाना, रिक्षा बॅज बनविण्यासाठी आवश्यक असलेली बनावट कागदपत्रे बनवून त्याचा वापर आरटीओ कार्यालयात करणार्‍या चौघांना भिवंडी गुन्हे शाखेच्या पथकाने अटक केली आहे. सुरुवातील गुन्हे शाखेच्या अधिकार्‍यांनी भिवंडीतील धामणकर नाका येथील केजीएन संजरी ऑटो कन्सल्टन्ट येथे छापा मारून दोघांना अटक केली. त्यानंतर अटक केलेल्या आरोपींनी दिलेल्या माहितीच्या आधारावर पोलीसांनी आणखी दोघांना अटक करून अनेक बनावट कागदपत्रे आणि शिक्के हस्तगत केले आहेत. नफीज सगीर अहमद फारुकी (38), नाजील नवाज अहमद मोमीन (28), मोहम्मद इस्माईल मोहंमद रजा अन्सारी उर्फ पप्पू (34), संगमेश्‍वर मरोळसिद्ध स्वामी (42 ) अशी अटक करण्यात आलेल्या आरोपींची नावे आहेत.
भोईवाडा पोलीस ठाण्यात गुन्हा दाखल
भिवंडी गुन्हे शाखेच्या पथकाला मिळालेल्या माहितीनुसार 18 जानेवारीला पोलिसांनी संजरी ऑटो कन्सल्टन्ट धामणकर नाका येथून आरोपी नफीज व नाजील यांना अटक केली. त्यांच्याकडून पोलिसांनी बनावट चारित्र्य प्रमाणपत्र, महाराष्ट्राचा नागरिक असल्याचे डोमिसाईल सर्टिफिकेट, रिक्षा परमिटचे दस्त, मोटार विम्याचे कागदपत्र, लॅपटॉप हस्तगत केले. या दोन्ही आरोपीनी दिलेल्या माहितीच्या आधारे पथकाने आरोपी मोहम्मद व संगमेश्‍वर यांना अटक करून त्यांची चौकशी केली असता, आरोपी अन्सारी आणि स्वामी याच्या घराची झडती घेतल्यानंतर बनावट शाळा सोडल्याचे दाखले, डॉक्टरांचा बोगस शिक्का, आरटीओ अधिकारी यांचा शिक्का, बजाज इन्शुरन्स कंपनीचा शिक्का, तसेच या शिक्क्यांचा वापर करून तयार करण्यात आलेली कागदपत्रे सापडली आहेत.
अनेक बोगस कागदपत्रे सापडली
या चारही आरोपीकडून 45 बोगस चारित्र्य पडताळणी दाखले, 20 शाळा सोडल्याचे दाखले, 34 बनावट डोमिसाईल प्रमाणपत्र, 44 विमा कंपनीचे बनावट दाखले, डॉक्टरांचा बोगस शिक्का, आरटीओ अधिकारी यांचा शिक्का, बजाज इन्शुरन्स कंपनीचा शिक्का, 5 मोबाईल, 3 संगणक आणि 3 लॅपटॉप, असा 1 लाख 67 हजार 500 रुपयांचा मुद्देमाल हस्तगत करण्यात आला आहे. पोलिसांनी चौकशी करून आरोपींच्या घराची आणि दुकानाची तपासणी केली असता 284 फाईल, 211 ऑटो रिक्षाचे पासिंग फाईल, 39 इन्शुरन्स फाईल, 34 लर्निंग लायसन्स हस्तगत करण्यात आले आहेत.