बोगस मतदानाला आळा घालण्यासाठी मतदान कार्ड आधारशी जोडा: निवडणूक आयोग

नवी दिल्ली: मतदार ओळखपत्र आधार कार्डाशी जोडावे अशी मागणी निवडणूक आयोगाने विधी व न्याय मंत्रालयाकडे केली आहे. लोकप्रतिनिधी कायदा १९५० मध्ये सुधारणा करण्याची शिफारसही आयोगाने केली आहे. निवडणूक ओळखपत्र मतदारांच्या आधार कार्डाशी जोडल्यास बोगस मतदानासारख्या गैरप्रकारांना आळा बसेल, असे आयोगाचे म्हणणे आहे.

‘एक व्यक्ती एक मत’ योग्य प्रकारे राबवायचे असेल तर निवडणूक ओळखपत्राशी आधार कार्ड लिंक करणे अनिवार्य आहे. याबाबत निवडणूक आयोगाची अनेक दिवसांपासूनची मागणी आहे. आधी आयोगाने आधार आणि निवडणूक ओळखपत्र लिंक असणे वैकल्पिक असल्याचे म्हटले होते.

फेब्रुवारी २०१५ मध्ये पोल पॅनलने आधार कार्ड- निवडणूक ओळखपत्र लिंक करण्याविषयी मार्गदर्शक तत्वे जारी केली होती. हा राष्ट्रीय मतदार यादी सुधारणा कार्यक्रमाचा भाग होता. मात्र ऑगस्ट २०१५ मध्ये एका सुनावणीदरम्यान सर्वोच्च न्यायालयाने आयोगाचा हा प्रयत्न थांबवला. सार्वजनिक विकास योजनांचे लाभ आणि अन्य धान्य पुरवठा किंवा गॅस सबसिडी वगळता अन्य कोणत्याही कारणांसाठी आधार कार्डाचा वापर करता येणार नाही, असं सुप्रीम कोर्टानं स्पष्ट केलं. नंतर जुलै २०१७ मध्ये, मतदार ओळखपत्राशी आधार कार्ड लिंक करण्यासाठी मतदारांचे आधार तपशील मिळण्याची मागणी निवडणूक आयोगाने सर्वोच्च न्यायालयात एका अर्जाद्वारे केली.