ब्रिटन संसदेकडून सलमानचा सन्मान

लंडनमधील ग्लोबल डायव्हर्सिटी अवॉर्ड देऊन दबंग अभिनेता सलमान खानला गौरवण्यात आले आहे. सलमानला हा पुरस्कार ब्रिटनच्या हाऊस ऑफ कॉमन्सचे अध्यक्ष किथ वाज यांच्या हस्ते प्रदान करण्यात आला. वाज पुरस्कार प्रदान केल्यानंतर म्हणाले की, अशा व्यक्तींना ग्लोबल डायव्हर्सिटी पुरस्कार दिला जातो, ज्यांनी जगभरात वैविध्यासाठी उल्लेखनीय काम केले असेल. त्यापैकीच एक सलमान खान असल्याने, त्यांच्या कामाचा गौरव करण्यासाठी त्यांना या पुरस्काराने सन्मानित करण्यात आले आहे. सलमान खानचं कौतुक करताना वाज पुढे म्हणाले की, लोकांसाठी सलमान खान हा आदर्श आहेच. शिवाय त्याच्या बीईंग ह्युमन या स्वयंसेवी संस्थेच्या माध्यमातून समाजासाठी काम सुरू आहे. सलमान पुरस्काराबद्दल म्हणाला की, मला यापूर्वी अनेक पुरस्कारांनी सन्मानित करण्यात आले. पण हा पुरस्कार स्वीकारताना मला अतिशय आनंद होत आहे. माझ्या वडिलांनीही अशा मोठ्या पुरस्कारांनी मला गौरवले जाईल, अशी अपेक्षा केली नव्हती. सध्या ब्रिटनमध्ये सलमान उद्याच्या दबंग कॉन्सर्टसाठी उपस्थित आहे.