भाजपचे नगरसेवक कुंदन गायकवाड यांचे पद रद्द

पिंपरी-चिंचवड : महापालिकेतील भाजपचे नगरसेवक कुंदन अंबादास गायकवाड यांचा जात पडताळणी दाखला अवैध ठरल्याने महापालिका आयुक्त श्रावण हर्डीकर यांनी गुरुवारी त्यांचे नगरसेवकपद रद्द केले. त्यामुळे भाजपला मोठा धक्का बसला आहे. भाजपच्या आणखी तीन नगरसेवकांवरदेखील अपात्रतेची टांगती तलवार कायम आहे.

नितीन रोकडेंनी घेतली होती हरकत
पिंपरी-चिंचवड महापालिकेची सार्वत्रिक निवडणूक फेब्रुवारी 2017 मध्ये झाली. या निवडणुकीत कुंदन गायकवाड हे चिखली, प्रभाग क्रमांक एक मधून भाजपच्या तिकीटावर विजयी झाले. त्यांनी कैकाडी जातीचा दाखला सादर करत अनुसूचित जाती प्रवर्गातून निवडणूक लढविली होती. त्यांचे प्रतिस्पर्धी शिवसेना उमेदवार नितीन दगडू रोकडे यांनी गायकवाड यांचा जात दाखला आणि जात प्रमाणपत्र पडताळणीवर हरकत घेतली होती. गायकवाड यांचा जात दाखला अवैध असल्याचा निर्णय बुलढाणा जिल्हा विभागीय जात प्रमाणपत्र पडताळणी समितीने मंगळवारी दिला. एवढेच नव्हे तर, गायकवाड यांनी खोटी, बनावट कागदपत्रे सादर करून सरकारची फसवणूक केली असून, त्यांच्याविरोधात कारवाई करावी असे आदेशही देण्यात आले आहेत.

मानधनही वसूल करणार
कुंदन गायकवाड यांना देण्यात आलेले मानधनही त्यांच्याकडून वसूल करण्यात येणार आहे. नगरसचिव विभागाला तशा सूचना देण्यात येणार असल्याचे आयुक्त श्रावण हर्डीकर यांनी सांगितले. दरम्यान, राखीव प्रवर्गातून निवडून आलेल्या भाजपच्या दोन नगरसेवकांनी मुदतीत जात प्रमाणपत्र पडताळणी दाखला सादर केला नाही. तर, एका नगरसेविकेने उच्च न्यायालयाने स्थगिती दिल्याचे पत्र महापालिकेला दिले आहे. त्यामुळे भाजपच्या आणखी तीन नगरसेवकांवर कारवाईची टांगती तलवार कायम आहे.