भाजपला मदत करणाऱ्या राष्ट्रवादीच्या नगरसेवकांना कारणे दाखवा नोटीस-नवाब मलिक

अहमदनगर-अहमदनगरमधील महापौरपदाच्या निवडणुकीत भाजपाला मदत करणाऱ्या राष्ट्रवादी काँग्रेसच्या नगरसेवकांना पक्षाने कारणे दाखवा नोटीस बजावली आहे. १८ नगरसेवकांनी पक्षश्रेष्ठींचे आदेश धुडकावत भाजपाला साथ दिल्याने त्यांना कारणे दाखवा नोटीस बजावली असून त्यांनी समाधानकारक उत्तर न दिल्यास संबंधितांचे पक्षातून निलंबन केले जाईल, अशी माहिती पक्षाचे प्रवक्ते नवाब मलिक यांनी दिली आहे.

अहमदनगरमध्ये आज महापौर आणि उपमहापौरपदाची निवडणूक पार पडली. अहमदनगरमध्ये एकूण ६८ जागा असून बहुमतासाठी ३५ चे संख्याबळ आवश्यक होते. निवडणुकीत शिवसेना २४, राष्ट्रवादी १८, भाजप १४, काँग्रेस ५, बसपा ४, सपा १ व अपक्ष २ असे संख्याबळ होते. भाजपाकडून बाबासाहेब वाकळे, शिवसेनेचे बाळासाहेब बोराटे व राष्ट्रवादीचे संपत बारस्कर यांच्यात तिहेरी लढत होणार होती. मात्र, राष्ट्रवादी काँग्रेसने माघार घेतल्याने भाजपाचे बाबासाहेब वाकळे महापौरपदी विराजमान झाले.