भाजप आमदारांची झाली चांगलीच कानउघाडणी!

मुंबई । महामेळावा यशस्वी झाला तरी भाजपच्या महाराष्ट्रातील आमदारांमागचे जबाबदार्‍यांचे शुक्लकाष्ठ काही संपले नाही. महामेळाव्यानंतर लगेचच राष्ट्रीय अध्यक्ष अमित शहा यांनी भाजपच्या सर्व आमदारांची कानउघाडणी केली.वांद्रे येथील एमसीए क्लब येथे झालेल्या बैठकीत झाडाझडती घेतली. अनेक आमदारांना त्यांनी मतदारसंघात नक्की काय काम केले आहे? पक्षाचे कार्यक्रम कशा प्रकारे राबवले आहेत? मोदी सरकारच्या योजना लोकांपर्यंत पोहोचवण्यासाठी नक्की कोणते प्रयत्न केले आहेत? आदी प्रश्‍न विचारत शहा यांनी आमदारांना फैलावर घेतले.

तर संधी हुकेल
ज्या आमदारांचा पुढील कामात परफॉर्मन्स दिसणार नाही त्यांची पुढच्या टर्मसाठी संधी हुकेल, असा सज्जड दम शहा यांनी दिल्याचे खात्रीलायक वृत्त आहे.

प्रत्येक आमदाराला 26 कामांची यादी
अमित शहा यांनी जाहीर सभेनंतर आमदारांशी साधलेल्या या संवादात प्रामुख्याने येणारी निवडणूक ध्यानात घेऊन बूथ पातळीवर करावयाच्या विविध 26 कामांची यादी प्रत्येक आमदाराला समजावून सांगितली. प्रत्येक बूथवर कोणते मतदार आहेत. त्यातील महत्त्वाच्या व्यक्ती कोणत्या. ज्येष्ठ नागरिक किती, स्त्रिया किती, पुरुष किती, तरुण किती आदी सर्व विषयांची इत्थंभूत माहिती घेऊन त्या प्रकारे बूथचे नियोजन कशा प्रकारे करावे, याची त्यांनी आमदारांसमोर मांडणी केली.

आमदारांना कानपिचक्या दिल्याची चर्चा
या कामावर अत्यंत गांभीर्याने लक्ष देण्याचे निर्देशही त्यांनी आमदारांना दिले. या बैठकीला खासदार मात्र उपस्थित नव्हते. या बैठकीत काही आमदारांना त्यांनी कानपिचक्या दिल्याची चर्चा भाजपच्या वर्तुळात होती. मात्र, भाजपच्या नेत्यांनी ही बैठक खेळीमेळीच्या वातावरणात पार पडल्याचे सांगितले.