भाजप आमदार पुत्राकडून काँग्रेस खासदार ज्योतिरादित्य सिंधिया यांना जीवे मारण्याची धमकी

भोपाळ-मध्य प्रदेशमधील एका भाजपा आमदाराच्या मुलाने काँग्रेसचे नेते खासदार ज्योतिरादित्य सिंधिया यांना जीवे मारण्याची धमकी दिली आहे. या प्रकरणावरून एकच खळबळ उडाली आहे. राज्यातील दामोह जिल्ह्यातील हटा विधानसभा मतदारसंघातील भाजप आमदार उमादेवी खटिक यांचा मुलगा प्रिन्सदिप लालचंद खटिकने सोशल मीडियावर एक पोस्ट टाकत सिंधिया यांना गोळी झाडून मारण्याची धमकी दिली आहे.

प्रिन्सदिपने सोमवारी फेसबुकवर पोस्ट करत, ज्योतिरादित्य ऐक, तुझ्या नसांमध्ये जीवाजीराव यांचे रक्त आहे. या जीवाजीरावाने बुंदेलखंडची मुलगी झांसीच्या राणीचा खून केला होता. जर उपकाशी हटामध्ये प्रवेश करून ही भूमी अपवित्र करण्याचा प्रयत्न केला तर मी गोळी झाडेन, एक तर मी मरेन नाहीतर तू, असा मजकूर प्रिन्सदिपने सोशल मीडियावर टाकला आहे.

येत्या ५ सप्टेंबरला सिंधिया हे हटा जिल्ह्यात एक सभा घेणार आहत. त्या पार्श्वभूमीवर प्रिन्सदिपने ही धमकी दिल्याचे बोलले जात आहे. ही पोस्ट अत्यंत दुर्दैवी आहे. सिंधिया हे सन्मानीय खासदार आहेत. अशा पद्धतीची पोस्ट केली नाही पाहिजे. मुलाने ही पोस्ट का केली, याची माहिती घेत आहे. ही पोस्ट हटवण्यास सांगेन, असे उमादेवी यांनी आयएएनएसशी बोलताना सांगितले. प्रिन्सदिपने यापूर्वी मुख्यमंत्री शिवराजसिंह चौहान यांच्याबाबतही आक्षेपार्ह शब्दांत वक्तव्य केलेले आहे.