भाजप आमदार बलात्कारी, मोदींनी उत्तर द्यावे-राहुल गांधी

जयपूर : उत्तर प्रदेशात एक आमदार महिलेवर बलात्कार करतो. पण पंतप्रधान मुग गिळून बसले आहे, अद्याप एक शब्द निघाला नाही, अशी जोरदार टीका काँग्रेस अध्यक्ष राहुल गांधींनी नरेंद्र मोदींवर केली आहे. कोटामध्ये महिला काँग्रेस कार्यकर्त्यांशी संवाद साधतांना ते बोलत होते. पंतप्रधान बेटी बचाओ बेटी पढ़ाओची घोषणा देतात. महिलांसाठी ही घोषणा चांगली आहे. मात्र ज्यावेळी प्रत्यक्ष काहीतरी करुन दाखवायची वेळ आली, तेव्हा त्यांनी काहीच केले नाही, अशी टीका राहुल यांनी केली.

‘महिला काँग्रेस अनेक बाबतीत आम्हाला मागे टाकून पुढे गेल्या आहेत. काँग्रेसच्या महिला कार्यकर्त्या रस्त्यावर, शहरात, गावात जागोजागी पाहायला मिळतात. महिला काँग्रेसनं पक्षाच्या सर्व विभागांना मागे टाकले आहे असे कौतुक त्यांनी महिला कॉंग्रेसचे केले. तुम्ही सर्व आघाड्यांवर भाजपाशी संघर्ष कराल, अशी आशा आहे,’ असेही राहुल गांधी म्हणाले.

लवकरच विधानसभा निवडणुकीला सामोरे जाणाऱ्या राजस्थानात भाषण करताना राहुल यांनी इंधन दरवाढीवरुन सरकारवर तोंडसुख घेतलं. जगभरात पेट्रोल, डिझेलचे दर कमी होत असताना भारतात मात्र इंधनाचे दर भडकले आहेत. आधी गॅस सिलेंडर चारशे रुपयांना मिळत होता. आता त्यासाठी नऊशे रुपये मोजावे लागतात. काँग्रेसच्या हातात सत्ता दिल्यास ही महागाई कमी होईल. त्यामुळे काँग्रेसला विजयी करा, असे आवाहन त्यांनी केले.