भाजप-आरएसएस संघटना बांधणीत काँग्रेसच्या पुढे
नवी दिल्ली : देशभरात झालेल्या सार्वत्रिक निवडणुकांमध्ये काँग्रेसला जवळपास सर्वच राज्यांमध्ये पराभवाला सामोरे जावे लागले आहे. या पराभवाची समीक्षा करण्याचे काम आता काँग्रेस पक्षात सुरू झाल्याचे पहायला मिळत आहे. नुकतेच काँग्रेसचे ज्येष्ठ नेते दिग्विजय सिंह यांनीदेखील काँग्रेसच्या नेतृत्वावर टिकेची झोड उठवली होती. तर गोव्यातील पराभवालाही पक्षाच्या पराभूत उमेदवारांनी राहुल गांधी यांच्याच नेतृत्वाला दोषी धरले होते. यासर्व पार्श्वभूमीवर पी. चिदंबरम यांची ही कबुली राजकीय पटलावर महत्त्वपूर्ण मानली जात आहे.
दरम्यान, संघटनेच्या रचनेचा विचार केल्यास भाजप आणि राष्ट्रीय स्वयंसेवक संघा (आरएसएस) समोर काँग्रेस कुठेही नाही. संघटनेच्या ढाच्याचा विचार केल्यास काँग्रेस आणि भाजपची तुलनाच होऊ शकत नाही, असे काँग्रेसचे ज्येष्ठ नेते आणि माजी अर्थमंत्री पी. चिदंबरम यांनी म्हटले आहे. स्पष्टपणे बोलायचे झाल्यास काँग्रेस पक्षाची रचना भाजप आणि राष्ट्रीय स्वयंसेवक संघाच्या रचनेसमोर कुठेही दिसत नाही, अशी स्पष्ट कबुली चिदंबरम यांनी दिली. फिअरलेस अपोझिशन या पुस्तकाच्या प्रकाशनावेळी चिदंबरम यांनी ही कबुली दिली.
मतदानाच्या दिवशी मतदारांना मतदान केंद्रापर्यंत नेण्यात संघटनेची रचना महत्त्वाची असते. काँग्रेससारख्या राष्ट्रीय पक्षाला 29 राज्यांमध्ये निवडणूक लढवण्यासाठी 29 रणनीतींचा अवलंब करावा लागेल. गुजरातमध्ये यशस्वी ठरलेली रणनीती आसाममध्ये यशस्वी ठरू शकणार नाही. त्यामुळे 2019 च्या लोकसभा निवडणुकीत 29 राज्यांसाठी 29 व्यूहनीती असायला हव्यात, असे पक्ष नेतृत्वाला सांगितले आहे, असेही चिदंबरम यांनी यावेळी सांगितले.
आम्ही राजकीय वादविवादात पराभूत झालो असलो, तरीही आम्ही आर्थिक वादविवादात विजय मिळवला आहे, अशा शब्दांमध्ये चिदंबरम यांनी नोटाबंदीच्या निर्णयावर भाष्य केले. नोटाबंदीच्या निर्णयामुळे सकल राष्ट्रीय उत्पन्न 7.83 टक्क्यांवरुन 6.61 घसरले आहे. सीएसओच्या अहवालातून ही आकडेवारी समोर आली आहे, अशा शब्दांमध्ये चिदंबरम यांनी नोटाबंदीच्या निर्णयामुळे नुकसान झाल्याचे अप्रत्यक्षपणे सांगितले.
यावेळी चिदंबरम यांनी काश्मीर प्रश्नावर सर्वपक्षीय शिष्टमंडळाचा भाग असताना आलेल्या अनुभवांचाही उल्लेख केला. काश्मीरमधील 370 कलम कायम असायला हवे. तेथील नागरिकांचा विश्वास संपादन करणे अत्यंत आवश्यक आहे, असेही चिदंबरम यांनी यावेळी सांगितले.