भाजप पदाधिकाऱ्याकडे सापडलेल्या शस्त्रांबाबत मुख्यमंत्र्यांनी स्पष्टीकरण द्यावे-जयंत पाटील

मुंबई-फॅशनेबल वस्तूंच्या नावाखाली खुलेआम शस्त्रास्त्रांची विक्री करणाऱ्या भाजपाच्या पदाधिकाऱ्याला काल रात्री कल्याण क्राइम ब्रँचच्या युनिटने अटक केली. धनंजय कुलकर्णी असे त्याचे नाव आहे. त्यांच्या दुकानातून कल्याण गुन्हे शाखेने १७० प्राणघातक शस्त्रे जप्त केल्याने राजकीय वर्तुळात खळबळ उडाली आहे. यावरुन राष्ट्रवादी काँग्रेसचे प्रदेशाध्यक्ष आमदार जयंत पाटील यांनी भाजपावर जोरदार हल्लाबोल केला आहे.

‘येणाऱ्या काळात भाजपा कशाप्रकारे राज्य सांभाळणार आहे हेच यातून पाहायला मिळत आहे’अशी टीका जयंत पाटील यांनी केली आहे. तसेच, ‘या शस्त्रांचा वापर करून भाजपाला कोणत्या दंगली घडवायच्या होत्या? मुख्यमंत्री देवेंद्र फडणवीस यांनी या विषयावर स्पष्टीकरण देणं अपेक्षित आहे’ अशी मागणीही जयंत पाटील यांनी केली आहे. ‘भाजपाचे पदाधिकारीच जर अशाप्रकारे बेकायदेशीर शस्त्रसाठा बाळगणार असतील तर राज्यात गुंड आणि दहशतवाद्यांची गरजच उरणार नाही असेही जयंत पाटील यांनी सांगितले आहे.

डोंबिवलीच्या मध्यवर्ती ठिकाणी असलेल्या एका दुकानावर अचानक धाड टाकून पोलिसांनी दुकानदार धनंजय कुलकर्णी याच्या मुसक्या आवळल्या. धनंजय कुलकर्णी हा भाजपाचा डोंबिवली शहर उपाध्यक्ष आहे. त्याच्या दुकानात शस्त्रसाठा असल्याची माहिती पोलिसांना मिळाली होती. यानुसार पोलिसांनी छापा टाकून शस्त्रसाठा जप्त केला. जप्त करण्यात आलेला शस्त्रसाठा सुमारे 2 लाख रुपयांचा आहे. भाजपा पदाधिकाऱ्याच्या दुकानातून शस्त्रसाठा जप्त केल्याने खळबळ उडाली असून याप्रकरणामुळे भाजपाची कोंडी होण्याची शक्यता आहे.