भाजप युवा मोर्चाचा ‘रास्ता रोको’चा इशारा
इंदापूर । अधूनमधून पडणारा पाऊस, ढगाळ हवामान व जागोजागी साठलेले पाणी यांमुळे लासुर्णे परिसरात विषाणूजन्य आजारांच्या रुग्णांमध्ये वाढ झाली आहे. सर्दी, खोकला व ताप येणार्‍या रुग्णांची संख्या सरकारी व खासगी रुग्णालयात वाढत असल्याचे चित्र इंदापूर तालुक्याच्या पश्चिम भागात पाहावयास मिळत आहे. यापार्श्‍वभूमीवर रास्ता रोको आंदोलन करण्याचा इशारा भाजप युवा मोर्चाने दिला आहे.
लासुर्णे व सणसर प्राथमिक आरोग्य केंद्रातील अधिकार्‍यांशी संपर्क साधला असता समजले, की सध्या विषाणुजन्य आजारांच्या रुग्णांचे प्रमाण वाढले असून, त्यावर उपाययोजना सुरू केल्या आहेत. सणसर प्राथमिक आरोग्य केंद्रात 25, तर लासुर्ण्यात 20 रुग्ण सर्दी, खोकला व ताप यासारख्या आजारांचे आढळले. लासुर्ण्यातील प्राथमिक आरोग्य केंद्राच्या कार्यक्षेत्रात एक संशयित स्वाइन फ्लूचा रुग्ण आढळला होता. त्यांच्यावर बारामतीतील खासगी रुग्णालयात उपचार सुरू होते. त्यांची प्रकृती स्थिर असल्याने घरी सोडण्यात आले आहे. यावर आरोग्य सभापती प्रवीण माने यांच्याशी संपर्क साधला असता विषाणूजन्य आजारांवर जिल्ह्यातील सर्व जिल्हा आरोग्य आधिकार्‍यांना यावर उपाययोजना करण्याच्या सूचना दिल्या आहेत.
ग्रामपंचायत प्रशासनाच्या वतीने गावामध्ये तातडीने धूर फवारणी करणे गरजेचे आहे. पावसामुळे गावात ठिकठिकाणी पाणी साठले आहे. त्यामुळे डासांची मोठ्या प्रमाणात उत्पत्ती होत आहे. परिणामी, रुग्णांच्या संख्येत वाढ होत आहे. त्यामुळे गावात व वाड्यावस्त्यांमध्ये तातडीने धूरफवारणी करण्याची मागणी ग्रामस्थांनी केली आहे.
भाजप युवा मोर्चाचे जिल्हा उपाध्यक्ष गजानन वाकसे यांनी सांगितले की जिल्हा आरोग्य विभाग स्वाइन फ्लूविषयी उदासीन असून लशीबाबत विचारणा केल्यास उडवाउडवीची उत्तरे मिळत आहेत. लस प्राथमिक आरोग्य केंद्रात ठेवण्यास परवानगी नसेल, तर जिल्हा नियोजन मंडळाच्या बैठकीत जिल्हाधिकारी व पालकमंत्री यांच्याशी चर्चा करून राज्य सरकारकडे मागणीबाबत त्वरित हालचाली कराव्यात. अन्यथा, जिल्हा परिषद आरोग्य विभागाच्या विरोधात पुणे जिल्हा भाजप युवा मोर्चाच्या वतीने रास्ता रोको आंदोलन करू.