भाजप-राष्ट्रवादी कार्यकर्ते आपसात भिडले

सांगली । निवडणुकीच्या वादातून तासगावमध्ये भाजप आणि राष्ट्रवादी काँग्रेसमध्ये जोरदार राडा झाला. यावेळी दगडफेक, मारहाण आणि पोलिसांच्याकडून लाठीचाराच्याही घटना घडल्या. दरम्यान या दगडफेकीत 3 पोलीस जखमी झाले आहेत. तर या राड्यामुळे मोठा तणाव निर्माण झाल्याने शहरात पोलीस बंदोबस्त तैनात करण्यात आला आहे.

कार्यकर्त्यांकडून दगडफेक
तासगाव नगरपालिकेच्या वार्ड क्रमांक सहाची पोट निवडणूक पार पाडत आहे. या निवडणुकीच्या प्रचाराच्या वादातून भाजप खासदार संजय काका पाटील आणि राष्ट्रवादी काँग्रेसचे आर. आर. पाटील यांच्या गटात जोरदार हाणामारी झाली. यावेळी दगडफेक आणि काठ्यांनी दोन्ही गटात तुफान राडा झाला. सोमवारी रात्री उशिरा हा सर्व प्रकार घडला. यामध्ये राष्ट्रवादीच्या स्थानिक पदाधिकार्‍यांच्या घरावर भाजप कार्यकर्त्यांनी जोरदार दगडफेक केली. यानंतर राष्ट्रवादीच्या कार्यकर्त्यांनी भाजपच्या नगरसेवकास मारहाण केली. यामुळे शहरात रात्री मोठा जमाव एकमेकांसमोर आला होता. पोलिसांनी घटनेचे गांभीर्य आणि दगडफेक सुरू होताच जमाव पांगवण्यास लाठीचार्ज सुरू केला. ज्यामध्ये दोन्ही गटाकडून झालेल्या दगडफेकीत 1 पोलीस अधिकारी आणि 2 पोलीस कर्मचारी डोक्याला मार लागल्याने गंभीर जखमी झाले आहेत. जखमी पोलिसांना शासकीय रुग्णालयात दाखल करण्यात आले आहे. तर राड्यानंतर तासगाव शहरात मोठा तणाव निर्माण झाला. त्यामुळे पोलिसांनी शहरात मोठा पोलीस बंदोबस्त तैनात केला आहे.