भारतरत्न वाजपेयी जयंती: राष्ट्रपती, पंतप्रधानांनी वाहिली श्रद्धांजली

नवी दिल्ली: आज २५ डिसेंबर रोजी माजी पंतप्रधान भारतरत्न अटलबिहारी वाजपेयी यांची जयंती. जयंतीनिमित्त त्यांना श्रद्धांजली वाहिली जात आहे. दिल्लीतील त्यांच्या ‘सदैव अटल’ या स्मृतीस्थळावर जाऊन राष्ट्रपती रामनाथ कोविंद, पंतप्रधान नरेंद्र मोदी आणि गृहमंत्री अमित शहा यांनी अभिवादन केले. यावेळी प्रसिद्ध भजन गायक अनुप जलोटा यांच्या भजनांनी अटलबिहारी वाजपेयी यांच्या आठवणींना उजाळा देण्यात आला. लालकृष्ण अडवाणी, भाजपाचे कार्यकारी अध्यक्ष जे. पी. नड्डा, संरक्षण मंत्री राजनाथ सिंह, लोकसभा अध्यक्ष ओम बिर्ला यांच्यासह विविध पक्षीय नेत्यांनी याठिकाणी हजेरी लावली होती.

तत्पूर्वी पंतप्रधान नरेंद्र मोदी यांनी ट्विटद्वारे वाजपेयींना अभिवादन केले. उत्तर प्रदेशची राजधानी लखनऊ येथील प्रधानमंत्री लोक भवन येथे उभारण्यात आलेल्या माजी पंतप्रधान अटलबिहारी वाजपेयी यांच्या भव्य पुतळ्याचे आज पंतप्रधान नरेंद्र मोदी यांच्या हस्ते अनावरण होणार आहे.